TULOY-TULOY at tila, ayaw paawat ang mga negatibong balita na lubos na nagpapababa sa kalagayan ng Philippine National Police (PNP).
Matinding krimen ang mga lumalabas sa mga ulat.
Ngunit kung ang survey na lumabas kamaikalan ang pagbabasehan, lumalabas na kuntento si Juan sa performance ng kapulisan.
Sa nasabing survey, mataas na 53% ang ibinigay ng taumbayan na grado sa PNP sa pagharap sa kanilang sinumpaang tungkulin.
Ibig-sabihin, epektibo si Dir. Gen. Alan Purisima bilang pinuno ng PNP dahil oks siya kay Juan ayon sa findings ng naturang survey.
Tinanong ko ang aking mga kaibigang matatanda na riyan sa Crame kung ano ang kanilang masasabi sa inilabas na survey.
In fairness, anila, matinding ‘modernization’ ang ipinakilala ni Purisima para mabago ang paningin sa mga alagad ng batas.
Pinalakas daw ni Purisima ang training ng mga bagong pulis na itinatalaga sa patrol beats. Scout ang tawag sa innovation na ito.
Ipinakilala rin at sinigurong maisakatuparan kwento nila ang police E-blotter para maging accurate na ang crime reporting.
Utak din, anila ni Purisima ang pag-alis ng maraming pulis sa desk job para dalhin sa field para lumawak ang police presence.
Iniutos din ni Purisma ang walang patid na training and upgrading skills ng mga police detective at police investigator.
Ito ang dahilan, dagdag nila kaya tumaas sa 36.5% ang crime solution.
At ayon sa police blotter reports, noong nakaraang taon, ang average crime volume kada buwan ay 70,000 cases. Pero ngayong taon, bumaba ito sa 51,000 cases kada buwan.
Maganda naman pala ang nangyayari sa kasalukuyang liderato ng PNP, pero bakit sa tingin ng madla ay napakatindi ng krimen.
Sa mga ulat, napakatindi ang krimen pero sa survey tumaas ang crime solution at bumaba ng malaking porsyento ang insidente ng krimen.
Magkaganon pa man, kailangan sigurong magtrabaho ang kapulisan dahil hindi pa nila naabot ang expectation ng taumbayan. CHOKEPOINT/BONG PADUA
