ARAW-ARAW na lang ay nababasa o naririnig natin ang balita tungkol sa sakit na galing sa virus na Ebola.
Maging ang makapangyarihang Pangulo ng Amerika na si Barack Obama ay personal na kasali sa ginagawang hakbang sa US na mapuksa ang paglaganap pa ng sakit na mula sa virus.
Maging dito sa Pilipinas, napag-uusapan din ng mga ahensya ng ating gobyerno kung paano mapananatili ang kaligtasan natin laban sa sakit na ito na mabilis kumakalat sa mga bansa kung saan ito nag-umpisa tulad na ng Africa.
Galing daw sa mga hayop ang Ebola, ang sabi ay sa fruit bats daw galing ang virus at kumalat sa tao.
Mabilis ang epekto at daglian ang kamatayan ng biktima.
Sa ngayon, Ebola-free ang Pilipinas at maigting ang kampanya na mapanatili ito sa pamamagitan ng masusing pag-screen sa mga pumapasok na bisita mula sa mga bansa na Ebola-infected.
Maging mga Pinoy na umuuwi rito sa atin na maaaring galing sa bansa na may kaso na ng Ebola ay pwedeng imbestigahan.
Pero hindi dapat dito lang ang focus. Dapat ay mas malalim ang ating kaalaman tungkol dito para sa ating kaligtasan.
Libo-libo na ang namamatay sa Ebola. Makabagbag damdamin ang kwento ng mga pamilya ng mga biktima, lalo na ang mga bata na naulila at walang gustong kumupkop dahil sa takot sa sakit na ito.
Ang dasal natin ay sana huwag makarating sa ating bansa ang Ebola at walang Pinoy na mahawa ng nakamamatay na virus na ito.
Pero mag-alay rin tayo ng dasal sa mga biktima na walang kalaban-laban dahil hindi pa nadidiskubre ang gamot laban sa Ebola.
Ang tumimo sa aking isip ay nagsimula ang Ebola sa mahirap na bansa.
Ang kahirapan at kawalan ng pasilidad para sa kalinisan ang isa sa itinuturong dahilan kung bakit naging napakalaking problema ng mundo ang Ebola.
Kahirapan ang puno’t dulo ng marami sa ating problema. Ipagdasal natin na masugpo na sana ang kahirapan sa mundo.
***
Mag-email ng inyong reaksyon sa ariel.inton@gmail.com or text sa 09178295982 o 09235388984. SIBOL/ATTY. ARIEL ENRILE-INTON
