BINABATIKOS ng mga mambabatas sina Health Acting Secretary Janette Garin at AFP Chief of Staff Gen. Gregorio Pio Catapang, Jr. sa pagiging reckless umano sa pagtanggap sa kaso ng Ebola virus sa bansa.
E, kasi naman, nagpunta sina Garin at Catapang sa Caballo island kung saan naka-quarantine ang 133 peacekeeper galing Liberia nang walang suot na protective gear.
Upang matiyak na ‘di makapapasok sa bansa ang nakahahawa’t nakamamatay na sakit, pansamantala silang inilagay sa isla sa loob ng 21-araw.
Kahit ang kanilang mga pamilya ay hindi pwedeng makalapit sa mga sundalo.
Pero mukhang itong sina Garin at Catapang ang baka makahawa sa atin ng sakit. Dahil sa kanilang kabobohan.
Katwiran nila, wala silang nilabag na protocol. At nagnegatibo naman daw sa Ebola sa pagsusuri ng United Nations ang peacekeepers.
Ang paliwanag ni Garin, gusto lang daw nilang ipakita sa publiko na hindi dapat pandirihan ang peacekeepers dahil wala naman silang sakit.
Wala palang sakit, e, bakit pa inilagay sa quarantine sa malayong isla ang mga sundalo? Bakit hindi pa sila pauuwiin para makasama ang mga pamilya? At kung walang sakit ang mga kawal, e, ‘di dapat ay payagan ang kanilang mga kaanak na makadalaw sa kanila?
Bobo sa dilang bobo ang paliwanag nina Garin at Catapang. Habang ang Ebola ay seryosong mino-monitor at binabantayan ng buong mundo, tila naglalaro lang ang mga opisyal ng Department of Health at AFP.
Baka sila pa ang maging dahilan ng pagkakalat sa bansa ng nakamamatay na sakit.
Hindi bababa sa 5,177 na ang taong namamatay dahil sa Ebola, ayon sa World Health Organization (WHO).
Huwag tayong magtaka kung isang araw ay iulat na napasok na rin nito ang Pilipinas.
Pero kung nais ng gobyerno na matiyak ang kaligtasan sa Ebola virus ng mga Pinoy o maging Ebola free ang Pilipinas, iutos ang puwersahang pagkuha kina Catapang at Garin at sa mga kasama nilang nagpunta sa Caballo island para sila’y i-quarantine. KANTO’T SULOK/NATS TABOY
