SINASABI ng Philippine National Police na bumababa na ang krimen sa buong bansa dahil nagiging epektibo umano ang mga hakbangin nito laban sa krimen. Magandang balita ito at dapat na palakpakan ang kapulisan.
KAPANSIN-PANSIN
Ang kapansin-pansin naman na galaw ng kapulisan ay ang paglitaw ng mga ito sa mga lansangan nang wala sa oras.
‘Yun bang=== pagsulpot ng mga checkpoint. Para sa atin, maganda ito. Pamigil sa krimeng nais na isagawa ng mga kriminal.
Kaugnay nito, nais nating tanungin ang mga kinauukulan ukol sa mga riding-in-tandem na pumapatay ng kung sino-sino, nanghoholdap sa mga mamamayan sa kalsada at kung ano-ano pa.
Bumaba na ba ang rekord dito?
MAY PULIS NA, MAY PULIS PA
Makaraan ang P1-milyong iskandalo ng mga pulis-Quezon City sa hulidap sa EDSA sa Mandaluyong, nasundan ito ng mga sunod-sunod na krimen sa lansangan na may sumasabit na pulis.
May nanghulidap na grupo ng mga pulis sa Maynila. May tatlong pulis na nangholdap ng P1M sa Pasay.
May mga pulis na nadadakma at napapatay sa mga bilihan-bentahan ng mga droga. May mga nahuhuling sangkot sa mga karnaping.
Hindi naman mabilang ang mga nangongotong sa mga tsuper, vendor, operator ng mga pampublikong sasakyan at marami pang iba.
Anak ng tokwa, name it, you have it, ‘ika nga!
Tanong: kasama ba ang mga ito sa mga inirerekord-iniuulat ng mga pulis?
KIDNAPPING
Ano naman itong nauuso na pagkidnap sa mga kabataan-estudyanteng babae gamit ang mga sasakyan? Pinatutulog ang mga ito at dinadala sa kung saan-saan.
Nakararami ang tuluyan ng nire-rape at dinadala kung saan-saan, sa prostitusyon, sa kamatayan at iba pang malalagim na pangyayari gaya ng pagsunog sa kanila.
Kumusta, mga Bro, ang performance ng mga pulis sa mga kasong ito?
MAGTIWALA SA PULIS
Sa kabila ng lahat ng ito, naniniwala tayong marami pa ring pulis ang nabubuhay nang maayos at walang naiibang kati sa katawan.
Kaya masasabi nating dapat pa rin tayong magtiwala sa mga pulis… na sila ang ating mga bantay laban sa mga kriminal…at hindi bantay-salakay.
Kung kasindami o mas marami o kokonte ang ganitong mga pulis, ang mga mamamayan na lang ang tanungin ninyo.
Ang mga mamamayan ang tunay na makapagbibigay ng totoong larawan ng mga pulis.
Sila kasi ang biktima ng mga pulis-patola at mga kriminal.
o0o
Anomang reklamo o puna ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
