PEACE BE WITH YOU. Sana nga, ang tunay na kapayapaan ay makamit na ng sambayanang Filipino.
Hindi perpekto ang bansa natin. Iisa ang Republika ng Pilipinas. Ang mamamayan ay pawang mga Filipino, tayo, wala nang iba pa. Naunawaan namin na nasa labas ng Mindanao – ang inyong problema kaya kayo humawak ng armas.
Kahirapan. Kawalan ng edukasyon. Kakulangan ng programang pangkalusugan. Walang trabaho.
Katulad ninyo, kami sa labas ng Mindanao ay nakararanas din ng problema na nararanasan ninyo, mula noon hanggang ngayon.
Ang mga kaapihan ninyo ay kaapihan din namin bilang kapwa Filipino.
Katulad ninyo, ilan sa mga kababayan ang hindi na rin nakatiis at humawak sila ng armas para lumaban sa mga namumuno sa ating gobyerno.
Katulad pa rin ninyo, marami sa labas ng Mindanao ang namamatay sa kahirapan.
Tanong lang natin sa inyo na nasa pwersa ng Moro Islamic Liberation Front (MILF), kailangan pa ba talaga na magtayo kayo ng ibang estado sa loob ng nag-iisa natin na estado ng Republika ng Pilipinas?
Ang mga problema ninyo ay problema ng sambayanang Filipino. Ibig-sabihin, ang lahat ng kahirapan sa buhay na dinaranas natin ay gawa ng mga politikong bulok, kasabwat ang mayayamang elitista’t negosyante na mapagsamantala.
Sila ang kaaway ng sambayanan, bakit nadaramay ang kapwa nating maliliit?
Ang problema ay ang kabuuang sistema ng ating estado, ng mga ganid at swapang na politiko na alaga ng mga swapang na negosyanteng kumokontrol sa buo nating ekonomiya.
Sila ang tunay na kaaway, hindi ang mga inosenteng sundalo, pulis at ordinaryong mamamayan na napapatay tuwing kayo ay lumalaban!
Mga swapang na negosyante ay kasabwat ang mga mala-buwayang politiko.
Pinag-aaway tayo para lalo silang magkamal ng salapi ng bayan. Isipin ninyo. Sila ang mga ganid na kapitalista, asyendero komprador na nagbubuhos ng malaking pondo para linlangin tayong mga Filipino.
Pinag-aaway-tayo para patuloy nilang masarili ang yaman ng bansa. Sila ang mga tunay na subersibo!
Kung ang inyong armas man ang nakita ninyong panlutas sa kahirapan, dapat ay nakatutok at iputok iyan sa mga mapagsamantalang mga politiko at negosyante.
Sila ang naghahati sa ating lipunan. Sila ang bumuo ng gulo at kontradiksyon sa ating lipunan para makontrol nila ang yaman natin. Sila!
Suriin. Aralin. Malalaman ninyo, dear brothers in MILF et al, na ang problemang ginagalawan natin ay likha ng mga swapang na negosyante at politiko.
Papatay pa ba kayo ng inosente?
HARAM! Allahu Akbar! BALETODO/ED VERZOLA
