SA naganap na Senate Blue Ribbon Committee Hearing noong Lunes kaugnay sa insidente ng Mamasapano ay kitang-kita sa mukha ni dating PNP Chief Alan Purisima ang kanyang pagsisinungaling sa harap ng mga senator maging itong si AFP Chief General Catapang.
Para naman yatang walang pinagkaiba ang dalawang Heneral na ito lalo na itong si Purisima na Tagalog na nga lang ang isasagot, eh, kailangan pang basahin.
Teka nga pala napansin ko lang, scripted ba ‘yung mga tanong ng senastor kay Ret. General Purisima? Bakit binabasa niya ang kanyang mga sagot?
Alam ba niya kung ano ang mga itatanong sa kanya ng mga senator? Nagtatanong lang po…
Doon naman sa LP senators, halatang-halata sa kanilang mga katanungan kay Purisima na iniiwas nila ang Pangulo kaya sa mga tanong nila sa dating PNP Chief ay ito ang idiniriin.
Sa pagpapatuloy ng nasabing inquiry, sana lang lumabas na ang gustong malaman ng taumbayan at huwag na itong paikot-ikutin pa, sayang ang pera ang mga oras sa pabalik-balik na mga tanong tulad ng nangyaring imbestigasyon kay Vice-President Binay.
Mag-Focus sana ang mga senador sa mga tanong na gusto nilang malaman ang kasagutan hindi ‘yung tanong na halatang inilalayo sa isyu para hindi madiin ang taong kanilang pinoprotektahan. LILY’S FILES/LILY REYES
