MALINAW sa resulta ng SWS survey na pasok na ang divorce sa bansa kaya marapat lamang itong pakinggan ng Kongreso.
Kitang-kita sa resulta ng survey na 6 sa 10 Pinoy ang payag na sa diborsyo bilang solusyon sa hindi na maayos na pagsasama.
Sa kasalukuyan kasi ay mahal ang proseso ng paghihiwalay sa pamamagitan ng annulment kaya naman siguro marami sa mga naghiwalay na mag-asawa ay nagkakaroon na lamang ng unawaan.
Maging ang isyu ng pagiging konserbatibo ng mga Filipino ay hindi na gaanong naging usapin kung aanalisahin natin ang SWS survey na ginawa kamakailan dahil palaki na ng palaki ang may gusto ng diborsyo sa bansa.
Malinaw na tumaas ang may gusto ng divorce dahil noong 2011 survey ay halos kalahati lamang ng Pinoy ang may gusto ngunit ngayon ay halos mahigit na sa 60 porsyento.
Hindi pagsuway sa utos ng Diyos ang diborsyo pero solusyon ito sa ‘di na magandang takbo ng pagpapamilya kaysa lumala ang sigalot at awayan araw-araw.
o0o
Alam lahat ng abogado sa bansa na kapag hindi naibigay ang Temporary Restraining Order sa tamang oras ay ikinokonsidera na itong balewala.
Ito ngayon ang sitwasyon sa Makati na kung saan nahuli ang pagpapalabas ang TRO ng Court of Appeals na inasam-asam ni Junjun Binay.
Sa kasong ito, tama lamang na kilalanin ng DILG at iba pang ahensiya ng gobyerno si acting Mayor Kid Peña dahil ito ang inuutos ng batas.
Maging ang tao ay dapat itong maunawaan, ang mga taga-Makati lalo na, dahil mahirap magpalinlang sa mga politikong trapo. ALINGAWNGAW/ALVIN FELICIANO
