SA nakaraang kolum ay tinalakay natin sa pinakamaikling paraan ang ating kasaysayan bilang mamamayan ng Pilipinas. Simple lang ang dahilan. Ang pagsasabi ng mga nagpapakilala na sila raw ang mga tunay na lider ng mga kapatid natin sa Mindanao.
Tuwing may kontradiksyon sa pagitan ng pamahalaan at kanilang TRIBO, iginigiit ng ilang lider-Muslim sa Mindanao ang kasaysayan ng bansa. Sila lamang daw ang hindi sumuko sa digmaan laban sa kolonyalistang Kastila at Amerikano, pati na sa Hapones.
Iyan ang giit nila. Iginagalang natin ngunit sa mga panahon na iyon ng kolonyalismo, may ilang dugong bughaw na mga Sultan at prinsipe sa Mindanao ang naging “kaibigan” ng mga dayuhang mananakop. Isa na rito ang kolonyalistang Britanya na sumakop noon sa Malaysia at Indonesia. Pranses naman sa ibang bansa sa rehiyong Asya katulad ng sa Vietnam.
Maraming nangyari at pangyayari noon sa bansa na hindi naisulat ng tama, ayon sa totoong kasaysayan. Maliban sa malayang kalakalan – ang Pilipinas noon pa man ay sentro na ng pandaigdigang ekonomiya.
Wala pa ang kolonyalismo, ang mga negosyanteng mandaragat noon mula sa China, Mexico, Britanya at Espanya ay sa Pilipinas na sila kumukuha ng kanilang mga tauhan, hindi bilang mga alipin, kundi giya sa biyahe sa dagat.
Tayo ang sentro ng masiglang kalakalan ng mundo. Nandito kasi sa ating bansa ang tunay na yaman ng Inang Kalikasan mula sa lupa at tubig lalo na. Pangunahin tayong nagbebenta ng tela mula sa ramie lalo na ang mga seda na yari sa de-kalidad na cocoon silk. Ito ang paboritong tela ng mga damit ng mga dugong bughaw sa mundo.
Muli, ang Pilipinas bago dumating ang mga kolonyalistang Kastila at Arabo na nagbinyag sa atin bilang mga Kristiyano noong 1500 at Muslim noong 1300 ay nabibilang sa mga DUGONG BUGHAW ng mundo.
Wala pang cardinal, obispo at Hadji o Imam noon. Tayo’y kabilang sa rehiyon ng Malaya o Asya ngayon. Binubuo ang mga kaharian at sultanato ang buong bansa.
Sultan sa Mindanao, Rajah – Datu sa Bisaya at mga Apo sa Luzon!
Gamit ang mga balanghai, bangka, balangay na sariling gawa ng mga ninuno natin, nagpapalitan ng kalakal ang mga taga-Luzon, Visayas at Mindanao. Nakita ng mga kapwa taga-Malaya ang mga sasakyan-dagat natin noon na malalaki at kanilang kinopya ang mga ito. I-google ninyo sa Internet!
Layon natin sa maikling kasaysayan na ito ay para pigilan ang ilang sektor ng bansa na nagsasabing hindi sila Filipino. Iba raw ang lahi nila, lalo na ang ilang lider Muslim na nakapag-aral at gustong magtayo ng sariling imperyo – ang Bangsamoro!
Huwag natin iligaw ang mga kapatid natin na Muslim sa inyong MALI NA KASAYSAYAN. Na ang tayo ay lupaing Muslim at Islam. Mali ito! Nakasulat sa aklat ng kasaysayan natin, tayo ay mga dugong bughaw sa rehiyon ng Malaya bago pa man dumating ang mga Arabo at Kastila! BALETODO/ED VERZOLA
