KAHIHIYAN! Palagi na lamang tayong pinagtatawanan sa labas ng bansa dahil lang sa mga pantasya at ilusyon ni Pangulong Bengino Aquino III.
Sa kanyang pagharap kailan lang sa mga negosyanteng lokal at dayuhan, ipinagpilitan na naman niya na segunda raw tayo sa taas ng ekonomiya sa mundo? Idinagdag niya na tumaas daw sa US$6.1-bilyon ang FDI o Foreign Direct Investments na hindi nagawa ng mga administrasyon na nagdaan?
Kulang pa sa kanyang pagmamalaki at pagyayabang, ipinagdiinan niya ang kanyang “Matuwid na Daan” sa rami ng kanyang proyekto sa ilalim ng PPPP o Public Private Partnership Program.
Sa huli, binanatan niya uli ang kanyang mga kritiko na wala raw alam kundi manira at magpintas ng negatibo sa kanyang mga maganda raw na nagawa.
Hiramin natin ang banat niya kay suspended PNP SAF Director Getulio Napeñas tungkol sa masaker sa Mamasapano. “Sa powerpoint lang maganda ang ipinakita ni Napeñas, PURO PALPAK LANG DIN PALA…”
Mr. President, saan ka kumukuha ng K ng mukha sa mga sinasabi mo na tagumpay ng iyong Matuwid na Daan? Hindi ka ba nahihiya sa mga negosyante, lalo na sa mga dayuhan, na ipinaalam nila sa kanilang mga lider ng bansa ang tunay na estado natin?
Sa imprastraktura, maliban sa maikli na underpass sa Quezon Avenue ay wala na. Ang binuksan mo naman na expressway sa Cavite ay hindi mo programa. Utang sa International Monetary Fund (IMF) na nabayaran pero ngayon, puro utang na naman!
Hindi mo pwedeng ikumpara sa mga nagdaang administrasyon ang mga ginagawa mo ngayon dahil sila’y may mga nagawa sa sariling administrasyon samantalang ikaw ay wala pa as in walang-wala!
Dalawa lang iyan, Mr. Aquino. Niloloko ka ng iyong mga tauhan sa mga datos at paglikha ng iyong talumpati. O kaya naman, kung gawa mo ang datos at iyong talumpati, ikaw mismo ang boladas.
Sa mga kapihan at tambayan ng iyong mga tauhan, gabinete man o KKKK, kung maririnig mo lang ang kanilang mga kuwento ukol sa katigasan daw ng iyong ulo, mababaril mo sila right on the spot. Iyan ang totoo, ‘di ba, katotong Vic Vizcocho?
Pero magtataka ka, sa kabila ng lahat ay nakakapit pa rin sila sa iyong pundilyo. Ayaw bumitiw. Hindi dahil sa husay mo bilang lider ng bansa kundi dahil saiyong kapit-tuko na pakikisama at pangungunsinti sa kanila!
Sana may matino pang tauhan na natitira ang Pangulo. Pwede ba, bigyan ninyo ng tsupon si PNOY? BALETODO/ED VERZOLA
