HABANG tinitipa natin ito, mga Bro, nasa 2,000 na ang patay sa bansang Nepal.
Kilala ang Nepal dahil sakop nito ang Mt. Everest na pinakamataas na bundok sa buong mundo at dinarayo ng mga mountain climber.
Nag-unahan pa nga, sa tanda ko, ang GMA-7 at ABS-CBN, sa pagpapaakyat ng kanilang mga mountaineer noon at kanya-kanya ang pagsasabing nauna silang nakapagtanim ng bandila ng Pilipinas at istasyon nila roon.
2,000 PATAY
Ulat ng mga international press, umaabot na sa 2,000 ang patay na mga Nepalese at dayuhan.
Kabilang sa mga namatay na dayuhan ang mga mountaineer o mahilig mag-akyat ng mga bundok. Kasama sa mga patay ang kanilang mga guide na kung tawagin ay Sherpa.
‘Yun bang === mga native at taga-roon sa Mt. Everest na nakaaalam sa mga pasikot-sikot at delikadong kalagayan ng bundok, masama man ang panahon o hindi.
Pero nakararami sa mga patay ang nadaganan ng mga gumuhong bahay at iba pang mga gusali na nagkataong may mga taong nasa loob o naninirahan.
Siyempre pa, may mga gumuhong mga malalaking tipak ng yelo na kung tawagin ay avalanche.
Pero may mga landslide rin ng mga bundok at magkasama ang mga yelo at lupang gumuho sa mga pumatay rin sa mga taga-Nepal.
Parang katulad din ng nagaganap sa atin gaya ng nangyari sa Bohol nitong 2013 na mahigit 200 ang namatay at sa Baguio at Cabanatuan noong 1990 na mahigit sa 1,600 ang patay, kabilang na ang mahigit sa 150 sa Cabanatuan.
Wala nga lang yelo kundi mga tubig, putik at bato.
MAY PINOY BA?
May mga Pinoy at Pinay sa Nepal. May mga nakatira at nag-asawa na roon. May mga adbenturista o pumupunta lamang doon para akyatin ang pamosong Mt. Everest.
May mga nadamay ba sa mga ito at namatay?
Ito ang dapat na alamin ng mga kinauukulan. Sila ang dapat na pag-ukulan natin ng pansin o bigyan ng tulong.
Kahit nasugatan lang o nabibiktima ngayon ng sobrang ginaw o lamig o gutom.
Sana naman, walang nasugatan o namatay na Pinoy sa lugar.
PANDAIGDIGANG TULONG
Sa mga disgrasya sa atin na dulot ng lindol, mga Bro, naririyan ang mabilis na pagtulong sa atin ng mga dayuhan.
Siyempre pa, mayroon tayong mga sariling biktima ng kalamidad na dapat unahing bigyan ng tulong.
Pero dahil kaisa tayo at itinuturing natin na mga kapatid ang mga biktima ng kalamidad sa labas ng Pinas kaya magandang maisip natin kung paano tayo makatutulong.
Para sa mga dasal lamang ang maiaalay, taos-puso at taimtaim na panalangin ang sa kanila.
Sa mga may maibibigay naman na materyal na bagay mula sa pagkain, gamot, panggastos at iba pa, magandang magtanong sa ating pamahalaan o katulad ng Philippine Red Cross.
Malaki ang maitutulong ng mga ito sa pagpapadala ng tulong.
PAANO ANG PINAS?
Grabe talaga ang lindol, kung tumira ay ganoon na lamang. Karanasan na natin ito.
Marami na nga ang patay, nasasamang nawawasak ang kinabukasan ng libo-libong pamilya.
Bumabagsak din ang mga negosyo na malaki ang naitutulong sa kabuhayan ng marami.
Diyan lang sa Bohol, Baguio at Cabanatuan, hindi pa gaanong nakarerekober ang maraming biktima.
Lalo na ang mga nawalan ng mga haligi ng tahanan at nawasakan ng mga pundar na pag-aari at negosyo.
Pero kahit papaano, habang lumilipas ang panahon, gumagaling din ang mga sugat ng kamatayan at paghihirap sa bisa ng mga pagtutulungan at masidhing pananampalataya sa Diyos na mapagkalinga.
Sana naman, hindi na maulit pa ang mga lindol sa Bohol, Baguio at Cabanatuan.
BABALA SA METRO MANILA
Pero may babala sa Metro Manila at mga karatig na lalawigan ukol sa mga posibleng lindol.
May sinasabi ang Philippine Institute of Volcanology ang Seismology na posibleng magkalindol sa Metro Manila anomang araw.
May mga sinasabi pa nga na daan-daang libong mamamayan sa Mega Manila ang maaaring mamamatay sakaling mangyari ang isa umanong malakas na lindol mula sa San Jose City, Bulacan, Dingalan, Aurora hanggang sa mga lalawigan ng Laguna at Cavite.
Ito ang Marikina Valley Fault System.
May malaking bitak kasi ng lupa sa pagitan ng nasabing mga lugar na daraan sa San Mateo, sa mga lungsod ng Caloocan, Marikina, Quezon, Pasig, Mandaluyong, San Juan, Taguig, Muntinlupa, sa mga bayan ng San Pedro, Biñan, Sta. Rosa, Cabuyao at Calamba sa laguna at sa Carmona, Gen. Mariano Alvarez at Silang sa Cavite.
Nakahanda na ba tayo, mga Bro, sa lindol?
o0o
Anomang reklamo o puna ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
