WALANG katalu-talo ang taumbayan kapag nagsama sina House Speaker Sonny Belmonte at Senador Grace Poe bilang susunod na lider ng ating bansa.
Ngayong nalalapit na ang halalan, sina Belmonte at Poe ang masasabi kong ‘Best Team’ saang anggulo man tingnan. Kakainin ng buhay ang mga mandarambong.
Una at importante sa lahat, ang interes ng taumbayan ay protektado dahil nakatitiyak tayo na walang kontrobersiyal na gusali ang maitatayo o ‘di kaya’y mga tao na inilalatag sa kangkungan.
Walang talo ang taumbayan sa tambalang Belmonte at Poe! Ito’y dahil kailanman ay hindi sila nasabit sa anomang paratang o akusasyon ng pandarambong sa kaban ng bayan.
Interes ng taumbayan ang uunahin nila dahil sa kanilang ipinamalas na kahit kaalyado nila ng napuputukan sa trahedya roon sa bayan ng Mamasapano ay itinuloy pa rin nila ang imbestigasyon.
Iyan ay patunay lamang na si Belmonte at Poe ay mabuting lider na inuuna ang interes ng taumbayan kaysa sa kanilang kaalyado sa pulitika. Sabi nila, kontrolado ni PNoy ang Kongreso pero tinapos ni Belmonte ang pagdinig.
Si Poe na kaalyado rin naman ng Malakanyang ay hindi rin nagpapigil sa Senate Probe patungkol sa ‘SAF 44’ at iba pang isyu kung saan isinasabit ang administrasyon ni PNoy.
Pangalawa, walang katalu-talo ang tambalang Belmonte at Poe dahil tiyak na mauubusan ng boto ang kanilang mga kalaban gaya nina dating Makati City Mayor Jejomar at Davao City Mayor Rodrigo Duterte.
Kung karanasan din lang ang usapan ay malayung-malayo ang agwat ni Belmonte sa mga ito. Si Poe naman ay talaga naman sigurado na subalit ang ipinupukol lang sa kanya ay ang kanyang pagiging bagito sa pulitika.
Ang husay at linis ni Belmonte ay kailangang may katuwang na bise-presidenteng mahusay at malinis din tulad ni Poe gaya nang ipinamalas nito bilang hepe ng MTRCB hanggang sa kasalukuyan bilang Senador.
Si Belmonte at Poe ay hindi kailanman nadawit sa usapin ng kontrobersiyal na isyu ng paggamit ng Priority Development Assistance Funds (PDAF) o Disbursement Acceleration Program (DAP).
Si Belmonte na tinaguriang ‘Mr. Clean’ dahil walang akusasyon ng pandarambong o anomalya sa gobyerno ay kwalipikadong ibangga kina ‘Mr. Unclean’ at ‘Mr. Very Unclean’ upang isalba ang taumbayan.
***
Para sa komento o suhestyon: eksperto71@gmail.com EKSPERTO/JOIE O. SINOCRUZ, Ph.D.
