MAY pangil pa kaya ang “blacklist order” ng Bureau of Immigration (BI) laban sa mga dayuhang nakagawa ng kapalpakan sa ating bansa?
Naging mainit itong paksa dahil kay Wok Lek Man, isang residente ng Macau Administrative Region ng China, na pinigil ng Bureau of Customs nang dumating sa Mactan-Cebu International Airport galing Hong Kong noong isang linggo, sa hinalang drug trafficker ito.
Isang kahon na may tatlong kilong pulbos ang nakuha sa kanya, pero nang ipasuri sa Philippine Drug Enforcement Agency (PDEA) ay negatibo sa ipinagbabawal na droga.
Napag-alaman ng Customs na si Wok ay nailagay sa blacklist order noong Enero 24, 2015, kabilang sa mga dayuhang pinagbawalang pumasok sa bansa. Pero ipinagyabang ni Wok na “lifted” na siya sa blacklist order mula noong Abril.
Sa kanyang pasaporte ay makikitang ilang ulit itong nagpabalik-balik sa bansa.
Inaabot dati ng isang taon bago makapag-aplay ang dayuhan na maalis sa blacklist. Dalawang buwan lang ang nakalipas ay hindi na blacklisted si Wok.
Kung may “special offer” para maalis agad sa blacklist, tiyak na papatok ito sa lahat ng minarkahan ng BI. Ayon sa source ay mapabibilis ang pagtanggal sa blacklist sa mga rasong “humanitarian, economic and political”.
Magkano kaya ang isinukang pera ni Wok para makumbinsi ang mga opisyal ng BI? Ibig din malaman ng karamihan kung ligal ito o nagkaroon ng “lihim” na usapan.
Ang blacklist order ay paraan ng gobyerno na matuldukan ang kalokohan ng mga dayuhan sa Pinas, lalo na ang gumagawa ng iligal.
Pero ano ang magiging silbi at pangil na maipagmamalaki nito kung pera-pera ang usapan at may katapat na presyo ang pag-aalis nito? Ano po’ng masasabi n’yo rito, DoJ Secretary Leila de Lima?
***
SHORT BURSTS. Para sa mga komento o reaksyon, mag-email sa firingline@ymail.com o mag-tweet sa @Side_View. FIRING LINE/ROBERT ROQUE, JR.
