HINDI sa lahat ng oras o pagkakataon na ang pagiging sikat ay ikatutuwa ng isang taong popular sa mata ng bayan.
Ganyan, pakiwari natin ang nararamdaman ngayon ni Sen. Grace Poe.
Sa sobrang kasikatan kasi, siya’y pinag-aagawan ng administrasyon at oposisyon para makasama sa tiket sa darating na May 2016 election.
Ang senadora ay humahataw sa mga survey, pumapangalawa sa pagka-Pangulo at nangunguna sa pagka-Bise Presidente. Dahil mataas ang rating, umamin si Pangulong Aquino na kinausap ang anak ng yumaong si FPJ para sumama sa administration ticket.
Sa ulat, baka si Sen. Grace ang magiging standard bearer ng Liberal Party, pero umalma kaagad ang mga alipores ni Sec. Mar Roxas.
Kahit anong mangyari, gagawa ng paraan ang mga political adviser ni Sec. Mar para siya ang maging manok ng administrasyon. Kaya sa mga bata ni SILG, Mar – Grace ang kanilang niluluto, pero kay PNoy nais yata, eh, Grace – Mar.
Dahil nga sikat, ayaw patalo ang oposisyon kaya nililigawan din si Sen. Grace para maging Bise Presidente ni VP Jojo Binay.
Ang pag-aagawan ng administrasyon at oposisyon para makasama ang senadora sa kanilang tiket ay istratehiya nila para sa darating na halalan.
Naniniwala kasi ang kampo nina PNoy at Binay na magdadala ng malaking boto si Sec. Grace sa partidong sasalihan.
Pero anong partido ang kakampihan ng babaeng mamababatas – ang administrasyon ba o ang oposisyon? Mukhang ipit na ipit si Sen. Grace sa nag-uumpugang bato dahil parehong matimbang sa kanya ang administrasyon at oposisyon.
Sabi ng mga political expert, may utang na loob si Sen. Grace kay PNoy dahil sa pagkakatalaga sa kanya ng Pangulo bilang MTRCB chairwoman bago ito maging senadora. Nguni’t nagbanta rin si Manila Mayor Joseph Estrada na kilalang godfather ng oposisyon na siya’y ‘di tutulungan kapag sumanib sa administrasyon.
Tahimik man ito sa panunuyo ng administrasyon at oposisyon, mapapansin namang nagbibigay ito ng problema sa senadora. Mahirap talagang maging sikat at ramdam ito ngayon ni Sen. Grace. CHOKEPOINT/BONG PADUA
