MUKHANG bago ang gusto ng mga Filipino.
Ito kasi ang lumalabas sa mga survey na isinasagawa ng SWS at Pulse Asia na kung saan malinaw na naghahanap ng bagong masasandalan ang mga Pinoy na matagal-tagal na rin namang pinaiikot ng mga trapo.
Kitang-kita sa isinagawang survey ng dalawang nagungunang survey firm ang patuloy na pag-angat nina Grace Poe at Rudy Duterte, gayung consistent naman sa pagbaba sina VP Jojo Binay at DILG boss Mar Roxas.
Malinaw na ayaw na ng taumbayan sa trapo kaya humahanap sila ng bago na alam nilang may magagawa sa bayan.
Malinis na pagkatao at walang bahid ng korapsyon ang hinahanap ng sambayanan sa ngayon kaya ang sinasabing eksperyensya ay hindi na usapin dahil sawa na ang tao sa mga matatalino at dorobo.
###
Patuloy ang pag-iingay ni Ping Lacson.
Gusto talaga kasi ng mama, na dating bataan lamang ni Erap na maging Pangulo ng bansa. Maganda ang layunin sana ni Mang Ping pero iba ang pulitika sa bansa.
Panahon ang kalaban ni Lacson sa ngayon dahil ang kanyang ningning at bango sa pulitika ay lumipas na kaya’t mukhang malabo na ang kanyang pinapangarap na maluklok sa Malakanyang.
Senado ang mas dapat na target ni Lacson dahil dito ang realidad na meron siyang magandang tinatahak na pag-asa. ALINGAWNGAW/ALVIN FELICIANO
