NAUNGUSAN na ni Sen. Grace Poe si Vice-President Jojo Binay sa latest presidential survey ng Pulse Asia at Social Weather Station.
Sa kabila ng ipinupukol na residency at citizenship issues laban kay Grace, pulling away na ang senador kay Binay.
Sa naunang report ng Pulse Asia, umaabot sa 30 percent ang nakuha ni Poe, samantalang 22 percent lamang ang nakuha ni Binay sa kabuuang 1,200 respondents. Sa SWS naman, nakakuha ng 42 percent si Grace, samantalang si Binay ay nakakuha naman ng 34 percent.
Malinaw na ipinakikita sa survey ng Pulse Asia at SWS na sa kabila ng patuloy na black propaganda laban kay Grace, ang suporta ng publiko ay patuloy na nakukuha ng babaeng mambabatas.
Ang ibig lang nitong sabihin, underdog pa rin ang gusto ng taumbayan.
Sabi nga sa nauna kong kolum, nagpapabugbog lang si Grace!
Nagpasalamat naman si Grace sa kanyang supporters at nagsabing, “Muli, ako ay mapagkumbabang nagpapasalamat sa tiwalang ipinagkakaloob ng ating mga kababayan. Kasama po nila akong naghahangad ng isang bansang makapamumuhay ang bawat Filipino ng may patas na oportunidad at pagkakataong umunlad. Ang tinig ng ating mga kababayan ay mahalaga sa akin.”
Sa mga susunod na araw, asahang masusundan pa ang mga paninira laban kay Grace.
At dapat nakahanda rito ang kanyang kampo dahil tiyak pati ang kanyang pamilya ay ilalabas din ang “baho”, masira lamang ang kanyang planong maging Pangulo.
At sa nangyaring pagbibitiw sa gabinete ni Binay, asahang higit na magiging mabalasik ito sa kanyang mga kalabang politiko, lalo na sa mga presidentiable na tatakbo sa May 9, 2016 elections.
Sana, hindi maging marumi ang pulitika habang papalapit nang papalapit ang nakatakdang eleksyon. Nakalulungkot ang ganitong political scenario sa Pilipinas.
Nauuna ang siraan bago ang plataporma na dinadala ng bawat kandidato.
Umaasa tayo na higit na magiging aktibo ang iba’t ibang election watchdog, kabilang na ang PNP, sa sandaling magsimula na ang campaign period para sa matahimik na pambansang halalan. KANTO’T SULOK/NATS TABOY