KASAMA na ng buhay natin ang tinatawag na fixers.
Alam nating bawal ito dahil taliwas sa panuntunan ng batas pero hindi natin tuluyang maitakwil dahil naka tutulong naman minsan.
Para kasing talagang makapangyarihan ang mga fixer at kaya nilang gawin ang mga bagay na nagpapadali sa ating buhay kapalit ang kaunting halaga.
Halimbawa sa isang ahensiya ng gobyerno kung may kailangan kang ayusin na dokumento, mag-aalok ang mga fixer na sila na ang mag-aayos para sa iyo at hindi mo na kailangang pumila o magbigay ng mahabang oras dahil sila na ang bahala sa lahat. Siyempre ay may kapalit na bayad. Kung may extra ka namang pera, bakit hindi. Gagaan ang paglakad sa papel, hindi ka na mahihirapan. Pero bawal ito.
Oo at nakatutulong pero labag sa batas at isang krimen. Dapat naman talaga na ang ahensiya ng gobyerno ay may mga paraan para madali at maganda ang serbisyo sa tao nang sa ganun ay mawalan ng halaga ang mga fixer.
Hindi ko ipinagtatanggol ang mga gov’t agencies, malaki talaga ang kakulangan nila rito at ang palpak na serbisyo sa tao ang dahilan ng pagdami ng mga fixer.
Pero sana ay maintindihan ng tao na ang fixers din ang gumagawa ng problema sa paglakad ng proseso ng mga dokumento para nga naman hindi sila mawalan ng kita. Kung tutuusin, may paraan naman na makapagtransaksyon tayo sa gobyerno na hindi gumagamit ng fixers.
Minsan lang talaga ay nagkakatamaran at mas gusto natin ang madalian.
Bilang empleyado ng gobyerno at isa ring taxpayer tulad nating lahat, nananawagan ako sa tulong ninyo.
Puksain natin ang fixers.
Maraming pagkakataon na sila ang dahilan ng kapalpakan ng pagsasaayos ng proseso sa mga transaksyon sa gobyerno.
Minsan sinasadya nila na mas maging mahirap para sa inyo para kumapit kayo sa kanila.
Marami akong kaibigan at empleyado na naninindigang wala ng fixers mula ngayon.
Pero mas igigiit na nila na makuha ang tamang serbisyo mula sa gobyerno. Subukan natin.
oOo
Mag-email ng reaksyon sa ariel.inton@gmail.com o kaya’y mag-text sa 09178295982 o 09235388984. SIBOL/LTFRB COMM. ARIEL ENRILE-INTON
