MARAMI ang naghihintay sa magiging desisyon ni Davao City Mayor Rodrigo Duterte kung tutuloy ba itong kumandidato bilang Pangulo ng bansa o kahit na sa anong posisyon sa darating na 2016 presidential election.
Sa tuwing kapanayamin kasi si Duterte kung plano ba nitong kumandidato bilang Presidente ng bansa ay panay ang tanggi nito ngunit napapanood naman ng mga tao ang kanyang information ads sa mga telebisyon at ginagawa nitong pag-iikot sa iba’t ibang parte ng bansa.
Sa totoo lang, maraming Filipino ang sumusuporta kay Duterte kaya panahon na siguro upang magdeklara na ito ng kanyang kandidatura kung tatakbo man itong Pangulo o kahit na sa ano pang posisyon sa 2016.
Gusto kasing subukan ng mga Filipino kung kaya bang patinuin ni Duterte ang buong bansa kagaya ng ginawa nito sa kanyang lugar sa Davao kung saan ay kinikilala ngayon ang lungsod bilang isa mga pinakatahimik na siyudad sa buong mundo.
Nakilala si Duterte dahil sa paggamit nito ng kamay na bakal sa pagpapatupad ng batas at minsan pang nasangkot ang pangalan nito sa mga pagpatay sa mga kriminal at mga salot sa lipunan na gumagala sa kanyang lungsod.
Marami ang nagkagusto sa pagpapatakbo ni Duterte ng batas kaya hinihikayat itong tumakbo sa mas mataas na posisyon upang masubukan kung magagawa ba niya ito sa buong bansa na sabik na sabik nang magkaroon ng matinong gobyerno.
Anoman ang maging desisyon ni Duterte ay tiyak na susuportahan ito ng mga taong naniniwala sa kanya, lalo na iyong mga taong gustong-gusto nang magkaroon ng pinuno na hindi natatakot na ipatupad ang batas.
Aminin man natin o hindi, may mga naging pinuno tayo na takot na takot na ipatupad nang tama ang batas dahil sa pangamba ng mga ito na mababawasan ang mga taong susuporta sa kanya sa susunod na eleksyon.
Ibang-iba sa mga ito si Duterte dahil ang katwiran nga ng Mayor ng Davao, “Kung ayaw mong sumunod sa batas ay mabuti pang umalis ka na lang sa aming lugar dahil kung hindi, alam mo na ang maaaring mangyari sa’yo.”
Political will ang sinasabing paraan upang magkaroon tayo ng maayos na gobyerno at ito ang nakikita natin kay Duterte na walang kinatatakutan basta’t alam niya na kakampi niya ang batas at ang mga Filipino.
O Mayor Digong, deklara na! ALINGAWNGAW/ALVIN FELICIANO
