BAGO ko talakayin ang pangunahing paksa ng kolum na ito ay nais ko munang batiin sina Jeffrey O. Sumaong at Allen Lavarias na ikakasal ngayong araw ng Huwebes sa Palm Plaza sa Tarlac City.
Sana ay maging matagumpay, mabunga at mapayapa ang inyong pagsasama at ang pagbati ay ipinahahatid ng inyong Ninong na si Josue Bautista.
At ngayon ay dumako na tayo sa ating paksa hinggil sa pinasok na city sisterhood agreement kamakailan ng Parañaque City sa lungsod ng Haeundae na sakop ng Metropolitan District ng Busan, South Korea.
Naniniwala si Mayor Edwin L. Olivarez na dahil sa kasunduan ay malaki ang tiyansa na madaragdagan ang mga negosyo at oportunidad para sa trabaho sa kanilang lungsod.
Ang Haeundae na tinatawag na Happy City ay isa sa pinakamabilis na umuunlad na lungsod sa South Korea, maliban pa sa kilala rin ito bilang pangunahing tourist destination dahil sa magagandang mga karagatan at mga pasyalan.
Dahil nga sa tagumpay ng kasunduan at mga potensyal na benepisyong pwede nitong idulot ay sinabi ni Olivarez na plano rin nilang magkaroon pa ng ibang katulad na sisterhood agreement sa ibang mga lungsod sa ibang mga bansa.
Layunin ng mga kasunduang tulad nito na lalo pang makilala ang Parañaque na ngayon ay kilala sa taguring Bay City, sa ibang panig ng mundo nang sa gayon ay lumawak din ang oportunidad nito para sa kalakalan at negosyo.
Dumating ang mga delegado mula sa Busan sa pangunguna ni Mayor Baek Sun Ki at naganap ang pirmahan sa sisterhood noong Biyernes.
Inaasahan nang mapalawak ang kooperasyon ng dalawang lungsod sa larangan ng ekonomiya, kultura, sports, turismo, edukasyon at marami pang iba.
Magkakaroon din ng bukas na komunikasyon ang bawat isa upang sa gayon ay higit na maging matagumpay ang kanilang mga programa at inisyatiba.
Inaasahang madaragdagan pa ang mga business locator sa lungsod na umaabot na sa mahigit na sa 20,000 na may taunang gross sales na mahigit sa P300-bilyon. OPEN LINE/BOBBY RICOHERMOSO
