MUKHANG si Cong. Leni Robredo na ang gagawing ka-tandem ni Mar Roxas sa 2016.
Si Aling Leni kasi ang gusto ni Pnoy na maging ka-partner ni Roxas dahil bukod sa wala itong isyu ng kurapsyon sa katawan ay mayroon din itong maganda at matinong pangalan na hindi kayang kuwestyunin at yurakan ng kahit sinoman.
Bukod si Leni ang gusto ni PNoy ay karamihan sa mga naunang miyembro ng Liberal Party (LP) oldies ang sang-ayon sa kagustuhan ni PNoy dahil kasama nila ang asawa ni Leni na si Jesse noong naghihikahos pa lamang ang partidong dilawan.
Maging sa mga ginagawang konsultasyon ng LP ay si Leni ang nagiging bet nito sa pagka-VP dahil malinaw na isa itong lider na magtataguyod ng daang matuwid at mayroon itong puso sa tao.
Konsultasyon daw ang naging tatak ni Robredo sa tao at iyan ang katangiang dala ngayon ni Congresswoman Leni kaya naman siya ang bet ng karaniwang mamamayan.
Bukod sa ayaw ng LP oldies kay Alan Cayetano na isa raw mahirap kakampi dahil hindi ito team player ay halatang-halata daw ang pagiging ambisyoso nito na pwedeng mauwi sa pagsasaksak sa kanilang likod sa panahon at pagkatapos ng kampanya.
Mukhang destiny ang kalaban ngayon ni Robredo at iyan ang hindi kayang tanggihan ninoman dahil ang Lumikha ang may gawa at kagustuhan nito.
Medyo gipit na sa panahon ang LP para sa pagkuha ng ka-tandem mi Mar Roxas kaya’t naniniwala tayong si Leni na ang choice nila lalo na’t may blessing ito ni PNoy na lider nila sa ngayon. ALINGAWNGAW/ALVIN FELICIANO
