DUMARAMI ang lugar na nagdedeklara ng state of calamity dahil sa pananalasa ni bagyong Lando.
Kabilang sa mga nagdeklara nito ang Nueva Ecija, Nueva Vizcaya, Pangasinan, Benguet, bahagi ng Isabela, bahagi ng Quezon at Aurora, Baguio City, Tuguegarao City at iba pa.
Ibig-sabihin nito, mga Bro, maraming mamamayan ang grabeng napinsala sa kanilang buhay at kabuhayan at maraming lugar ang nasiraan ng mga imprastraktura na ikinawasak o ikinasira na rin ng pamumuhay ng maraming tao, kasama ang public service.
KAMAG-ANAK, KAIBIGAN
Habang dinudukot ng mga pamahalaang lokal ang kanilang mga pondong pangkalamidad at nananawagan sa pambansang pamahalaan ng tulong, nagkakarambola naman ang mga biktima sa paghiling ng tulong mula sa kanilang mga kamag-anak na hindi tinamaan ng kalamidad.
Ang paghiling ng tulong ng mga mamamayan sa mga kamag-anak at kaibigan ay nangangahulugan ng labis na kakapusan o kawalan ng pag-asa ng mga biktima na matutulungan sila nang tuwiran ng pamahalaan.
Kaya naman, mahalaga sa ngayon ang direktang suporta sa mga labis na napinsalang mga mamamayan sapagkat naririyan ang gutom at matagalang paghihirap na karaniwang hindi nararamdaman ng mga opisyal ng pamahalaan.
PAGKAIN
Kung sino pa ang mga lumilikha ng mga pagkain at kasaganahan para sa bansa, sila pa ngayon ang karamihan sa mga nagugutom at labis na naghihirap na rin sa ngayon: ang mga magsasaka, naghahayupan, may palaisdaan at mandaragat, ordinaryong obrero at iba pa.
Pagkain, mga Bro, ang pangunahin nilang hinihiling.
Ito’y dahil nasira o naanod ang kanilang mga produkto at alagang hayop o isda.
Nang daluhungin ang kanilang mga bayan at barangay ng baha na lagpas tao at umabot sa bubong ng kanilang mga tahanan, doon na nasira ang lahat.
Tanging ang mga tao lang ang nakakaripas ng akyat sa mga bubong ng bahay sa dilim ng gabi at naiwan sa baha ang mga palay at iba pang ani mula sa mga sakahan at doon na rin nalunod ang mga kalabaw, baka, baboy, manok at iba pa na alaga samantalang nakawala ang mga inaalagaang isda.
NOODLES ‘DI SAPAT
Matagalang gutom at paghihirap, mga Bro, ang dadapo sa libo-libong pamilya.
Sinasabing nasa 70,000 katao ang tuwirang dinaluhong ng mga baha at siniraan ng mga tahanan.
Pero karaniwang kulang na kulang ang pagbibilang ng pamahalaan sa mga biktima, gaya ng ibig-palabasin noon mismo ni Pangulong Noynoy Aquino na nasa 3,000 lang ang namatay sa bagyong Yolanda, kasabay ng pagsibak sa isang opisyal ng pulis na nagsabing maaaring aabot sa 10,000 ang patay.
Sa kalaunan, naitala ang 8,000 kataong namatay na mas malapit sa katotohanan sa sinabi ng pulis kaysa sa sinabi ni PNoy.
Mahigit P5-bilyon na rin umano ang mga ari-arian na nasira.
Ganyan katindi, mga Bro, ang pinsala ng mga mamamayan at lokal na pamahalaan na magtatagal ang epekto.
Kaya naman, hindi sapat ang mga noodles, lugaw at ilang pirasong sardinas at itlog na ipinamamahagi ng pamahalaan, maging ng mga non-government organization.
MATAGALAN
Pang-matagalang tulong ang hinihiling ng mga biktima.
Tulong na kasingtagal ng buong panahon ng pagsasaka o pag-aalaga ng mga hayop bago maibenta ang mga ito at magiging pundasyon ng mga hakbang tungo sa normal na pamumuhay.
Puhunan, mga Bro, ang kahilingan ng mga mamamayan, bukod sa mga panandaliang tulong para sa kanilang mga pangangailangan.
Ang pamahalaan lalo na ang dapat na kauna-unahang titingin kung ano ang magagawa nito.
Ito’y sa harap na rin ng malawak na kakapusan kahit ng mga hindi natamaan ng bagyo gaya ng mga obrerong kontraktuwal maging sa pamahalaan, may mababang sahod at sampung kahig, isang tuka.
PAG-AARAL
Ngayon pa lang, mga Bro, ang dami nang pamilyang humihiling ng ayuda para sa pag-aaral ng mga bata.
Kung hindi umano dumating si Lando, sana’y maigagapang kahit ng mga mahihirap ang kanilang mga batang mag-aaral sa elementary, high school at kolehiyo.
Ang totoo kasi, hindi lang ang mga high school at kolehiyo ang magastos.
Maging ang elementarya dahil sa rami ng mga proyekto na ipinapapasan sa mga magulang sa pamamagitan ng Parents-Teachers Association.
Paano ba himukin ang mga eskwela para sa enroll now, pay later?
Publiko man o pribado.
Sabi ng mga politiko, wala na silang pang-iskolar dahil wala nang pork barrel kahit meron sila gaya ng P424-bilyong lump sum na para sa kanila sa 2016 dahil kailangan ng mga ito sa halalan.
Paano nga ba ang mga batang mag-aaral?
Huwag sabihin ng gobyerno at mga politiko na hayaan na lang silang maging malnourished at bobo.
o0o
Anomang reklamo o puno ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
