MAY katwirang kabahan sina Mar Roxas at Jojo Binay kay Grace, ang anak ni Fernando Poe, Jr. na kandidato rin sa pagka-Presidente.
Walang tigil ang labas sa telebisyon ng mga lumang pelikulang tumabo sa takilya noong panahon ni FPJ. Kayrami ring mga documentary tungkol kay “Da King,” na patunay na hindi pa rin siya laos.
Hit na hit din ngayon ang teleseryeng “Ang Probinsiyano,” na remake ng pelikulang ito ni FPJ.
Mukhang tinalo na ng “Probinsiyano” na pinangungunahan nina Coco Martin, Bela Padilla at Maja Salvador sa Channel 2 ang sikat na SRO nina Doris Bigornia at Alvin Elchico ng Teleradyo na nasa same slot din.
Hindi rin ako magtataka kung bago mag-eleksyon sa isang taon ay ipalabas sa Mindanao nang libre ang mga pelikulang pinagbibidahan ni Fernando Poe, Jr.
Paano kaya kokontrahin nina Roxas at Binay ang pamamayagpag ng mga pelikulang gawa ni “Panday” na ama ni Grace?
Bugbog-sarado na sa mga demandang kinahaharap si Grace mula sa sinasabing mga tauhan ng Liberal Party ni Noynoy Aquino at United Nationalist Alliance ni Jojo Binay.
Katulad ni FPJ na matapos mabugbog-sarado ng mga masasamang tao ay nakababangon muli upang magtagumpay, manalo rin kaya siya sa mga nais tanggalin siya sa pagka-senador at Presidente?
Sa tunay na buhay, natalo si FPJ sa pagka-Pangulo.
Thank you raw sa “Hello, Garci” at nanalo si Gloria Macapagal-Arroyo na ngayon ay nakakulong sa Veterans Memorial Hospital.
Ganoon ba kasaklap ang daranasin ni Grace kung sakaling ma-disqualify siya ng Commission on Elections, ng Senate Electoral Tribunal, ng Court of Appeals at ng Supreme Court mismo?
Sinabi ni Mar na wala siyang kinalaman sa mga black propaganda laban kay Grace.
Name names, sabi ni Mar.
Ganoon din naman ang sabi ng kampo ni Binay na nanganganib ding masentensiyahan ng graft and corruption ‘pag nawala na ang kanyang immunity bilang Bise Presidente o Presidente kung siya man ay manalo. DEEP FRIED/RAUL VALINO
