MAY ibig-sabihin pa ba ang loyalty sa sistema ng pulitika sa ating bansa?
O, marahil, dahil sa mala-lobong personal na interes, ambisyong umaabot sa kalawakan at nakahihiyang kawalan ng dangal, ay naiba na at ini-ba pa ang kahulugan nito?
Kumbaga, nahulog ang kahulugan, at inapakan, sinipa-sipa. Wala nang kwenta ang loyalty.
Si Sen. Alan Cayetano ay maaalalang nakipagpulong kay dating Sec. Mar Roxas at kay PNoy mismo para maging kandidato ng LP sa pagka-Bise Presidente.
Hayun. Walang nangyari.
Kaya kumaripas kay Mayor Rody Duterte, kaawa-awang nanligaw, makapal ang mukha na nanuyo at desperadong naghintay.
‘Di talaga masikmura ni PNoy na maging VP ng LP si Cayetano kaya ayan, lipat siya agad kay Duterte. Kapag tuluyan na siyang ilaglag ni Duterte, kanino na naman kaya siya pipila?
Si Sen. Bongbong Marcos naman ay parang ganito rin. Tumungo kay Duterte at nang mag-pabebe pa si Duterte, dahil ayaw naman ni Marcos ma-zero, nakipag-tandem kay Sen. Miriam Santiago.
Kaso, tumuloy naman pala ang nagpakipot-kipot pa na Duterte, kaya mapapansing mistulang iniwan na rin ni Marcos ang ni-minsan ay ‘di man lamang niya nakasama sa kampanya na si Santiago.
Heto. Nakikipagsiksikan kay Duterte at Cayetano at mukhang nakasisingit naman.
Kailan kaya niya ipagtatapat, kung kakayanin niyang maging matapat, kay Santiago na kahit isang beses lang ay wala siyang balak sumama rito?
Si Rep. Leni Robredo ay iba at kakaiba. Mukhang sa lahat ng mga kandidato, siya ang pinaka-loyal.
Ang siste nga lang, parang napulbos ang kahulugan at natunaw ang kahalagahan ng tinatawag na loyalty.
Dati ang akala ay isa siyang progresibo na ‘di kayang lamunin ng bulok na sistema. Nakalulungkot. Nilunok niya ang lahat nang buong-buo.
Ang pinakamalinaw na halimbawa ay ang pagtalikod niya sa sarili niyang boto pabor sa dagdag na pension para sa mga retirado ng SSS.
Nang inilabas ng Pangulo ang desisyon na pag-veto, ‘di pa man alam ni Robredo kung bakit ay kumampi kaagad sa Pangulo, katulad din ng mga kapartido niya sa LP na pabor din ang boto pero lahat ay bumaligtad dahil ito ang direktiba ng partido. Sayang!
Akala pa naman ng lahat, kapag nagkaipitan at nagkapitpitan, ay walang dudang papanig si Robredo sa tao at hindi sa utos at dikta ng partido.
Mali pala ang inaasam na akala. Ano naman kaya ang susunod na pagkakataon na babaliin na naman niya ang kanyang sinasabing prinsipyo?
Napakarami pang halimbawa ng pambababoy sa tunay na diwa ng loyalty sa sistema ng pulitika sa ating bansa.
Abangan ang mga susunod na ratsada. KANTO’T SULOK/NATS TABOY
