NAPAKASASAMA ng mga balita na nasasagap natin mula sa ibang mga bansa.
Maging ang balita mula sa mga nadidisgrasyang overseas Filipino worker ay masama rin at mula mismo sa Pinas.
Kabilang sa mga balita sa ibang bansa na lumabas sa mga pahayagan sa Malaysia ang pagtanggap umano ng Islamic State of Iraq and Syria o ISIS ng oath of allegiance ng isang rebeldeng grupo na matatagpuan sa Mindanao.
Nakapaninindig-balahibo rin ang pahayag ng pamahalaang Pilipinas na hindi ito magbibigay ng anomang tulong sa mga pamilya ng mga nasunog na OFW sa Kurdistan, Iraq.
SINO SILA?
Ipagpalagay nating nakarating na sa kaalaman ng mga awtoridad ang balitang ukol sa ISIS, nararapat lang na kilalanin sila nang mabilis.
Ito’y para makagawa kaagad ang mga awtoridad ng mga kaukulang aksyon kung paano pigilin ang mga ito na maminsala kahit saang lugar sa mahal kong Pinas.
Nangangahulugan ito ng panawagan dapat ng mga awtoridad sa mga mamamayan na tumulong laban sa ISIS-Pinas. At kung magkaroon ng tulungan ng mga mamamayan at awtoridad, makaaasa tayo ng epektibong mga hakbang upang mapigilan ang pamiminsala ng mga ito.
SILA KAYA?
Ang Mindanao ay binubulabog ng mga kidnap-for-ransom at pamumugot sa mga biktimang hindi nakapagbibigay ng ransom.
Pinupugutan din ng ulo ang mga nahuhuling sundalo at pulis sa mga laban sa nasabing bahagi ng bansa. Gayundin na may mga pambobomba sa kahit saang lugar sa Mindanao pa rin.
Minsan na ring binomba nang matindi ang Metro Manila at tinamaan ang LRT train sa LRT station sa Blumentritt noong Disyembre 31, 2000.
Ang natatandaan natin, mga Bro, may namatay na 22 pasahero ng tren noon at iba pa ang mga nasugatan.
Noon namang Pebrero 27, 2004, binomba rin ang SuperFerry 14 at may namatay sa sunog at lunod na 116 katao.
Papuntang MIndanao noon ang barko at nasa labas na ng Corregidor sa Manila Bay, sakay ang mahigit sa 800 katao nang bombahin ito.
Tanong: ang grupo bang gumawa ng mga krimeng ito ang nanumpa ng katapatan sa ISIS?
MAY TERITORYO
Upang ganap na kilalanin umano ng ISIS ang grupong nasa Mindanao, kailangan nitong magtatag ng kanilang masasabing teritoryo sa kahit anomang bansa sa South East Asia na kinapapalooban ng Pinas.
Ito’y para siguro maganap ang ginagawa sa Iraq at Syria na may umiiral silang caliphate o katumbas ng isang gobyerno na may kontrol sa isang tiyak na lugar.
Pero hindi nangangahulugan, mga Bro, na hindi mamiminsala ang mga ito.
Tingnan na lang natin ang ginawa ng ISIS na pagpapabagsak ng eroplano ng Russia sa Egypt na kinamatayan ng mahigit sa 230 katao.
Gayundin na marami ang napatay, 130 lahat, ng mga pwersang ISIS sa Paris, France nang ratratin ng mga ito ang iba’t ibang lugar doon noong Nobyembre 13, 2015.
Kaya naman, muli, dapat na kilalanin nang todo ang mga ito upang mapagkaisa-hang pigilin ang mga ito sa paghahasik ng mga kamatayan at lagim.
METRO MANILA MAGHANDA
Mula ngayon, dapat na muling maghanda ang Metro Manila sa mga posibleng pambobomba.
Malamang na mas matindi ang mga gagawing pamiminsala. At ang masama sa halos lahat ng lugar na binobomba, pawang mga sibilyan ang target na walang kalaban-laban.
Hindi tayo lumilikha ng takot kundi nagmumungkahi lang tayo ng mga posibleng gagawin laban sa maituturing na terorismo.
Sa ibang salita, mga Bro, muling bantayan ang mga pampasaherong barko, ang mga tren, ang mga mall, ang mga simbahan, ang mga eskwelahan, ang mga bus, ang mga eroplano at marami pang iba.
Pinakamaganda talaga ang lubusang pag-iingat, pagbabantay at pagtutulungan bago pa may maganap na masasamang gawain ng mga terorista.
WALANG TULONG
Nakapanlulumo ang deklarasyon ng pamahalaan na walang makukuhang tulong o benepisyo mula sa pamahalaan ang 13 OFW na babae na nasunog at namatay sa Kurdistan, Iraq. At sapat na ang tulong ng pamahalaan sa pag-ayuda sa pag-uwi ng mga ito sa Pilipinas?
Ang katwiran ng pamahalaan, hindi dumaan sa tamang proseso ang nakararami sa mga OFW kaya maituturing ang mga ito na iligal ang pag-abroad ng mga ito.
Dahil iligal, wala silang maaasahan na benepisyo para sa kanilang mga naiwang pamilya.
Dapat na magpaliwanag nang husto ang gobyerno rito upang hindi ito magmukhang wala talagang paki sa mga maliliit na tao.
Ang dami nang sitwasyon na kinakitaan ang pamahalaan ng walang paglingap sa mga mahihirap at ang posisyon nito sa mga OFW ay dagdag lang sa masamang rekord nito.
Mungkahi natin sa gobyernong Aquino, mag-ingat sa mga pinagsasabi nito, lalo na ang mga pinaggagawa nito sa gitna ng pamimighati ng mga biktimang mahihirap.
Tatandaan, mga Bro, ang mga mahihirap na gaya ng mga OFW na nasunog ang pangunahing puwersa maging ng EDSA revolution noon.
oOo
Anomang reklamo o puna ay maaaring iparating sa www.remate.ph o i-text sa 09214303333. ULTIMATUM/BENNY ANTIPORDA
