NAGING bukambibig na ni Pangulong Aquino at ng Liberal Party na kailangan itakwil ang kandidatura ni Bongbong Marcos dahil kinulimbat ng kanyang pamilya ang bilyon-bilyong pera ng bayan at ito mismo ang ginagamit ngayon upang pondohan ang kanyang ambisyon sa pulitika.
Ngunit mukhang nakalilimutan o kinakalimutan na ang isa sa mga dahilan kung paano ito nagawa ng diktaduryang Marcos: ang Crony Politics. Ito ang pagkasangkapan sa iilan nilang mga pinagkakatiwalaan upang patuloy na gamitin ang pera ng gobyerno upang sila ay yumaman at para hablutin mula sa kontrol ng mamamayan ang resulta ng bawat halalan.
Samakatuwid, hindi lang mga Marcos ang guilty sa gawaing ito. Isang larawan na kumalat sa social media ang nagpapakitang guilty rin ang LP sa kasalanan na ito: si Mar Roxas, si Leni Robredo at si Eliza Antonino, naka-seatbelt sa isa lamang sa walong eroplanong pag-aari ng kaibigang matalik ni Roxas – ang mining magnate na si Eric Gutierrez.
Kung ang dating staff ni Roxas na si Antonino ay binigyan ng pwesto sa SSS Board – malamang ay hindi ito regalo, kundi bilang gantimpala – kahit walang background sa pananalapi. Hindi ba crony ang tawag sa kanya? Kung ang matalik na kaibigan ni Roxas at business partner ni Caloocan Rep. Egay Erice na si Gutierrez ay pinayagang bumili ng walong jetplanes na walang sapat na buwis na binayaran, hindi ba crony ang tawag sa kanya?
Hindi maibigay ang SSS pension hike sa senior citizens at mga retiree, pero ang sweldong halos 6-million kada taon mula sa SSS para sa dating alalay ni Roxas, pwede? Hindi mapagbigyan ng LP ang mga manggagawa, sa pribado man o sa gobyerno, ng mas mababang income tax pero ang isang bilyonaryong kaibigan, pwede?
‘Di ba yan ang kinababadtripan natin noong panahon ni Macoy?
Na iilan lang ang nakikinabang at hindi ang nakararami? KANTO’T SULOK/NATS TABOY
