KATULAD ng mga nagdaang eleksyon, ratsada sa kita ng malaking kita ang dalawang pangunahing survey firms, ang Social Weather Station (SWS) at ang Pulse Asia, Inc. Sinabi natin ito dahil noon, inamin ng dalawang ahensiya na ang kanilang surbey ay nagreresulta ayon sa gusto ng nagpapakomisyon sa kanilang sarbey.
Kamakailan din lang, ilan sa mga kandidatong senador ang pumiyok dahil nilapitan sila ng mga tauhan ng dalawang ahensiya at inalok na papasok sila sa mataas na surbey kung “magbabayad” sila ng tama.
Lamang, ayaw pumiyok ang mga nilapitan na kandidatong senador kung sino at magkano ang badyet sa pag-angat sa surbey.
Ang misyon ng SWS at Pulse Asia ay ikondisyon ang isip ng mga botante kung sino ang “pinalalabas” nila na mananalo. Linggo-linggo na nga ngayon ay magkakasunod na inilalabas ng SWS at Pulse Asia ang kanilang resulta.
Panay si Senadora Grace Poe raw ang nakauuna sa lahat ng presidential candidate batay sa sagot daw ng 1,200.
Sa inisyatibo ng aming grupo noon, wala ni isa man sa kanila ang nakausap, natanong, nalapitan o kaya naman kahit binayaran lumahok lang sa misyon ng pagtatanong ng SWS at Pulse Asia. Maski sa ilang lalawigan at bayan sa Luzon, Visayas at Mindanao, sa tulong ng aming kapwa media at kapanalig sa katotohanan, WALANG NAINTERBYU!
Kaya ang tanong natin sa SWS at PULSE Asia, saan at sino-sino ang mga tinatanong ninyo sa inyong mga bayad na surbey? Paano ang sistema at batayan ng inyong pagtatanong? Hindi ba niloloko lang ninyo ang taumbayan? Totoo ba kayo?
Kasi naman, hindi lang sa social media kundi mismo mula sa ating mga kaibigan mula sa Northern Luzon hanggang Mindanao, may mga kopya sila ng video kung gaano kakapal ang tao na dumadalo sa mga rali ni Davao City Mayor Rodrigo Duterte.
Ganoon din ang video sa rali nina Senators Grace Poe at Chiz Escudero. Kina VP Jejomar Binay at Miriam Defensor Santiago. Kumbaga, marami nga pero butal-butal ang bakante. Pero kay Mayor Duterte, sabi nga, hindi mahulugan ng karayom at lalong hindi hakot-bayaran!
Kaya alin ba ang totoo, SWS at PULSE Asia? Totoo ba kayo?
Hindi pwedeng dayain din ang PCOS machine para paboran sa daya ang isang kandidato laban kay Duterte.
TIYAK, MAGAGANAP ANG ISANG MADUGONG REBOLUSYON! Subukan ninyo! BALETODO/ED VERZOLA
