POSIBLE nga bang maayos pa o mapabilis pa ang serbisyo ng Internet sa ating bansa o mananatili na lang na ganito kabulok gayong may paraan pa naman palang magagawa ang pamahalaan.
At dahil dito ay naisipan ni dating Congressman Rolex Suplico, na magsampa ng reklamo sa tanggapan ng National Telecommunications Commission (NTC) laban sa Wi-Tribe Telecoms, Inc. (WTTI), High Frequency Telecommunication, Inc. (HFTI) at New Century Telecoms, Inc. (NCTI).
Sinasabing ang tatlong Telcos na nabanggit ay binigyan ng NTC ng Provisional Authority at Frequency Assignments ngunit sinayang lang ng mga ito ang 700 Megahertz na naka-assign sa kanila dahil hindi ito napakikinabangan ng mahabang panahon.
Ayon nga kay Suplico, ang mga bagay na ito ay paglabag sa mga kondisyong nakapaloob sa ibinigay na prangkisa ng NTC sa tatlong telcos.
May katwiran nga naman itong si Ex-Congressman Suplico na ireklamo sa NTC ang Wi-Tribe, HFTI at NCTI dahil nga sa kapalpakan ng mga ito na matugunan ang mga kondisyon sa taglay nilang prangkisa.
Paliwanag pa ni Suplico, First Nominee ng Abyan Ilonggo partylist, ang 700 megahertz frequency assignments na hindi naman ginagamit ng mga naturang telcos ay siyang in-demand na frequency para sa 4G at Long Term Evolution (LTE) deployment sa buong mundo kung saan mas mabilis ang koneksyon ng internet.
Sabagay, kung magagamit lang sana ang naturang Frequency ay mas epektibo ito dahil, ayon kay Suplico, tumatagos sa mga gusali at mas malawak ang coverage nito bukod pa sa mababawasan sana ang pagpapatayo ng mga tower o cell site.
Kung maikakalat daw ang 700 MGHZ sa lahat ng telcos sa bansa ay siguradong gaganda ang internet at on line service sa bansa o hindi na magkakaroon ng mabagal na paggamit ng internet sa Pilipinas.
Binigyan-linaw ni Suplico na noon hanggang ngayon ay advocacy na ng kanilang grupo na igiit sa pamahalaan na mabigyan ng mahusay na internet service ang bansa.
Sinasabi ring sa kasalukuyan, ang bansang Thailand at Pilipinas lang ang hindi gumagamit ng 700 mhgz frequency sa buong mundo. LILY’S FILES/LILY REYES
