MISTULANG nagkakalkal ng basura laban sa isa’t isa ang mga kandidato habang papalapit ang araw ng halalan.
Pasimuno riyan ang ilang kandidato sa pagka-pangulo na desperadong maka-remate sa mata ng publiko sa pamamagitan ng ilang major survey.
Matatandaang una nang sinilip ang umano’y overpriced City hall building at inakusahan si VP Jejomar Binay ng kanyang mga kalaban.
Sunod namang kinuwestyun ang US citizenship ni Senadora Grace Poe ng mga kalaban nito noong siya ay nangunguna pa sa survey.
Hinarap at sinagot ni Poe ang mga paratang na ito. At ngayong ilang araw na lang at halalan na, si Davao Mayor Rodrigo Duterte naman ang inuulan ng intriga na kesyo may daan-daang milyong yaman umano ito sa bangko.
Itinanggi na ng alkalde ang paratang kasabay ang sabi na nasa “thousand” lang ang pera niya sa nasabing BPI bank account.
Makaraan ang tatlong presidential debates, hindi pa nagkasya ang ilang presidentiables na batikusin ang iba.
Sa halip na ilahad nang puspusan ang maipagmamalaking accomplishments, puspusan ang paghahalukay ng kabulukan o anomang baho na mailalabas.
Palibhasa, may mga kandidato na wala namang sapat na nagawa para pagbutihin ang kalidad ng pamumuhay ng taum-bayan. Kaya pulos paninira ang ginagawa.
Sa susunod na mga araw, ano pa ang isisiwalat ng ilang desperado laban sa kanilang katunggali?
Wala na silang paggalang sa isa’t isa. Nakasasawa na ang ganitong taktika. Sa maraming pagkakataon, naiinsulto lang ang katalinuhan ng mga taumbayan.
Kung ‘di pa desidido, nabubuo at nagiging malinaw na ang pag-iisip ng publiko tungkol sa pagkakaiba ng mga kandidato.
Ang mga kandidatong naninira o malinaw na nagsasagawa ng “demolition job” or black propaganda laban sa mga karibal sa eleksiyon ay siyang matatanggalan ng maskara.
Kalungkot-lungkot at mayroong pagkakataon na nagagamit pa ang ilang pahayagan. At may pagkakataon na ang sinisiraan at nabubugbog sa paratang ay siya lamang umaangat. Kasabihan nga, ‘yung pinupukol ang mabunga.
Ibig-sabihin lang niyan na wala nang kredibilidad ang mga naninira. Kaya tumigil na kayo!
* * *
Welcome po ang inyong reaksyon, opinyon at reklamo. I-email po sa etulfo2011@yahoo.com o bisitahin nyo kami sa Erwin Tulfo Action Center sa 2nd Floor, Quedsa Plaza, Quezon Ave. cor. EDSA, Quezon City, 9am-4pm Monday-Friday. DEADSHOT/ERWIN TULFO
