ANO ba itong nababalitaan ko na puspusan ang pagkalap daw ng mga NBI agent, hindi ng mga impormasyon o ebidensiya, kundi ng kwarta raw ngayon???
Bising-busy raw ngayon sa panghuhuli ang mga tauhan ni NBI Dir. Virgilo Mendez ng mga negosyante at mga kumpanya pero hindi naman sinasampahan ng kaso.
Kapalit daw kasi ng hindi pagsampa ng kaso ay milyones umano na lagayan kahit ‘yung wala namang kaso ay napipilitan umanong maghatag para ‘di maabala ng mga animo’y gutom na gutom na agent ng NBI.
Isang halimbawa rito ang raid ng NBI sa sabungan sa Mabalacat, Pampanga noong nakaraang buwan.
Hinuli ng mga patay-gutom na miyembro ng NBI-NCR ang isang production company dahil sa pagbi-video raw ng sabong na hindi naman bawal.
Hindi nagpaareglo ang may-ari ng naturang kompanya kaya kinumpiska nila ang mga gamit nito. At nitong linggo lamang ay ni-raid ng NBI-Cavite ang isang warehouse ng mga bakal dahil substandard umano ang mga produkto nito kahit hindi naman.
Bukod sa walang kasamang mga tauhan ng DTI, nakapagtatakang pinagbabasag ng mga agent ang CCTV camera ng naturang warehouse sa hindi malamang dahilan.
Ayon sa bulung-bulungan napilitan daw umareglo ang may-ari ng milyones para maibalik lang ang kanyang mga bakal na wala namang problema at ‘di na ito maabala pa sa pagpunta sa korte.
Noong Biyernes lang pinasok ng mga ulopong na ahente ng NBI ang isang bodega na naman ng bakal sa Malabon.
Ayon sa kwento, hiningan din ng pera ang may-ari ng warehouse ng NBI habang pwersahang binitbit ang kawawang negosyante sa kanilang opisina.
Alam ni Mendez na mapapalitan na sila pag-upo ng bagong administrasyon sa Hulyo a-uno.
Tingin ng ilan, nag-iipon lang ng pang-retirement ang mga opisyal ng NBI ngayon pa lang kaya masipag itong manghuli pero binabangketa lang umano ang mga kaso.
Nakahihiya! DEADSHOT/ERWIN TULFO
