PATULOY pa rin na umaarangkada ang sikretong multi-million operation ng mga sindikato ng ‘paihi’ ng produktong langis na ang nasa likod ay pawang mga kilalang operator na nakikipagkutsabahan sa mga driver at pahinante ng mga oil refinery station sa Bataan.
Isang alyas Norma Aquino na tinaguriang “Reyna ng Paihi” sa lalawigan ng Bataan ang kilalang may-ari ng ‘paihi’ sa buong Mariveles, Bataan na gamit ang kanyang mga trusted na mga tauhan na kumakana ng mga nakaw na langis mula sa mga delivery oil tanker.
Ang nakapagtataka rito, ay kung bakit tila nagbubulag-bulagan ang kapulisan ng Bataan-Philippine National Police (PNP) at mga pinunong lokal na gobyerno ng Bataan ganoong lantaran at kalat na kalat ang talamak na ginagawang pagnanakaw ng mga produkto ng petrolyo na minamani-obra ni Norma Aquino.
Napag-alaman pa natin, na matagal na raw ang operasyon ng paihi sa nasabing lalawigan na hindi magalaw-galaw dahil malaki ang nakukuhang “padulas o lagay” ng mga otoridad na nakapatong dito.
Kung totoo man ito, hindi ko sinasabi na isa si Bataan Provincial Director S/Supt. Rodel Seremonia ang nakikinabang sa padulas na ibinibigay ni Norma Aquino. Sus, ginoo!!!!
BOOKIES NI ACEBO MALAKAS DAW KAY RD
Namamayagpag pa rin ang bookies ng STL ni Jerry Acebo sa Ibaan, San Jose at Lipa City na pawang sa lalawigan ng Batangas.
Hindi matibag ang bookies ni Jerry Acebo dahil walang ipinagmamalaki ito kundi malaki ang intelihensiya nito sa regional office ng Region 4-A.
Ano kaya masasabi ni OIC Region 4-A S/Supt. Ronald Santos?
oOo
Anomang puna o reklamo, i-text sa 09189274764, 09266719269 o i-email sa juandesabog@yahoo.com JUAN DE SABOG/JOHNNY MAGALONA
