SA kabila ng kaliwa’t kanang batikos na ibinabato ngayon kay Vice President Leni Robredo ng kanyang mga detractor ay wala ka pa ring maririnig na kahit na anong salita galing sa kanya.
Bagama’t pormal ng naiproklamang Vice President itong si Leni Robredo, ay hindi pa rin siya tinitigilan ng mga taong ayaw sa kanya, lalo na ‘yung mga loyal kay Sen. Bongbopng Marcos.
Mga kakosa, mag- move on na po tayo, may naiproklama nang Vice President, panahon na para magkaisa tayong mga Filipino.
Iwasan na natin ang patutsadahan dahil kahit anong sabihin ninyo, Bise Presidente na si Mrs. Robredo.
Bagama’t hindi ipinakikita ni Vice President Robredo na naaapektuhan siya sa mga ibinabato sa kanyang maaanghang na salita ay marunong ding masaktan ‘yan.
Isipin po natin na itong si Vice President Leni ay isang babae at ang isang babae ay iginagalang at nirerespeto dahil marunong din naman itong masaktan.
Marunong lang sigurong magdala itong si Vice President sa mga batikos sa kanya pero magkagayunman man ay tigilan na sana natin ang kaliwa’t kanang batikos sa kanya.
Noong nakalipas na Mayo 30 ay naiproklama ng Kongreso ang ating bagong Pangulo at pangalawang Pangulo, ngunit tanging si Mrs. Robredo lang ang dumating.
Sa tingin n’yo kaya ay hindi nasaktan itong si Leni Robredo sa hindi pagdating at pagsipot ni President-elect Rodrigo Duterte?
Aminin man o hindi nitong ating bagong Bise President e, alam nating nasaktan ito at malaking insulto ito para sa kanya pero nanatili pa ring kalmado si Leni.
Ngayong naiproklama na itong si Mrs. Robredo, sana’y tanggapin na natin at yakapin siya nang buong-buo para makapagtrabaho ito nang maayos.
Marami nga ang bumilib sa kanya nang sabihin niyang hindi siya mag-o-opisina sa Coconut Palace dahil sa napakalaki ng upa na inaabot daw ng kalahating milyon ang isang buwan.
Maghahanap na nga lang daw siya ng mga murang mauupahan na siyang gagawing satellite office sa iba’t ibang probinsiya para makatipid. LILY’S FILES/LILY REYES
