WALA pa ring tigil sa pag-o-operate ng mga video-karera (VK) ng isang pulis-Caloocan.
Sa halip na siya ang manguna para masugpo ang iligal na pasugalan sa Bagong Silang, Caloocan City, ang pulis pang si alyas Sgt. Roda ang nagpapalaganap ng mga makina sa nasabing lungsod.
Mantakin ninyo, hanggang ngayon ay tikom pa rin ang bibig ni Caloocan C/Supt. Bartolome Bustamante sa sangkaterbang makinang nailatag ni alyas Sgt. Roda sa mga barangay gaya ng Bgy. Malaria, Bgy. Bagong Silang, Bgy. Baraks at Bgy. Pangarap.
Maging ang station commander ng Barugo Police Station ay nakatunganga lang. Hindi man na lang niya mapatigil ang walang puknat na pagdami ng mga makina na na nagiging sentro pa ng malawakang bentahan ng droga sa mga nagbi-VK.
Ang matindi pa rito, mismong ang mga opisyal ng Caloocan Police ang nagsisilbing protektor ng nasabing kabaro. Kahit alam na nilang si alyas Roda ang may-ari ng nasabing mga VK ay nagkikibit-balikat na lamang ang mga ito dahil sa lagay na ibinibigay ng nasabing pulis.
Ano ba ito PNP chief Gen. Ricardo Marquez, hindi lang sa droga patong ang mga pulis ninyo kundi maging sa mga iligal na pasugalan? Sila pa mismo ang mga promotor.
Pakiwalis naman ninyo ito bago kayo lumisan.
OIL PILFERAGE SA BATANGAS, BUWAGIN
Sa pag-upo sana ni President-elect-Rodrigo Duterte sa June 30, 2016 ay isama niya sa mga huhulihin ang talamak na oil pilferage o pagpapaihi ng mga produkto ng petrolyo na binabalewala lang ng kapulisan.
Gaya ng lang itong oil pilferage o paihi ni Kap. Felix sa San Jose, Batangas na matagal nang nag-o-operate at kahit alam ng kapulisan ay hindi ito hinuhuli dahil malaki raw ang lagay kay hepe.
***
Anomang puna o reklamo i-text sa 09189274764, 09266719269 o i-email sa juandesabog@yahoo.com JUAN DE SABOG/JOHNNY MAGALONA
