SA mga heneral o opisyal ng Philippine National Police, hindi matunog ang pangalang Chief Superintendent Oscar Albayalde.
Kaya nang mahirang na hepe ng National Capital Region Police Office (NCRPO), ‘di nakapagtatakang marami ang nagulat.
Pero para sa mga nakakakilala sa butihing heneral, ang pagkakatalaga nito sa NCRPO ay katuparan ng kanyang kasipagan.
‘Ika nga ng mga nakausap kong PNP generals, low profile na opisyal si Gen. Albayalde, miyembro ng PMA Class ’86.
Malaki raw ang pagkakahawig ng police career ni Gen. Albayalde sa classmate na ngayo’y Dir. Gen. Ronald ‘Bato’ dela Rosa.
Kung tawagin sila’y ‘pulis probinsya’ dahil ang kanilang matagal nang serbisyo ay halos ginugol sa iba’t ibang lugar ng bansa.
Pulis-probinsya man kung sila’y tawagin, maningning naman daw ang police career nina PDG Dela Rosa at Gen. Albayalde.
Sa Mindanao, kung saan ginugol ni PDG Bato ang karerang pulis, si Pangulong Duterte ang nagpapatunay ng kanyang kagalingan.
Mismong si DU30 ay napabilib kaya marahil siya ang napusuan at itinalagang manguna sa mahigit 160,000 miyembro ng PNP.
Tulad ni PDG Bato, si Gen. Albayalde ay natalaga sa iba’t ibang provincial assignment, pinakamatagal sa Central Luzon.
Naging MM intel head din noong 1990s. Dito ay malaki ang kanyang naging ambag sa magandang accomplishment ng NCRPO.
Sa panahon din na ito naganap sa kanyang makasaysayang police career ang isang pangyayaring masasabing ‘one for the book’.
Makasaysayan, ‘di lamang kay Gen. Albayalde kundi sa buong PNP dahil sa kasaysayan, siya’y na-promote nang dalawang beses.
Mula sa ranggong senior inspector, ‘di na dumaan sa ranggong chief inspector dahil dumiretso kaagad sa ranggong superintendent.
Tulad din ni PDG Dela Rosa, maraming malalaking achievement si Gen. Albayalde bilang isang probinsyanong pulis.
Dahil sa kaaya-ayang accomplishment, kaya ‘di nagdalawang-isip si PDG Bato na italagang NCRPO chief si Gen. Albayalde.
Bilang NCRPO director, so far, so good naman si Gen. Albayalde dahil bumaba nang husto ang komisyon ng krimen sa Metro Manila.
Keep up the good work, general. CHOKEPOINT/BONG PADUA
