SISIGURADUHIN ko na ang lahat ng pamilya ay may trabaho, negosyo, kumikita at umaasenso! Benigno ‘Bam’ Aquino:
Naniniwala ba kayo, parekoy, na ang tumataginting na pangakong ito ng senatoriable na si Bam Aquino ay kaya niyang tuparin kung sakaling manalo na senador?
Lahat ng pamilya kaya niyang bigyan ng trabaho? Lahat ay kaya niyang bigyan ng negosyo? Lahat ay aasenso?
Langya, parekoy, kahit sina Superman, Batman, Spiderman at Incredible Hulk ay hindi kayang gawin ito.
Kahit man lang sa ilusyon o maging sa isang panaginip!
At sa kasaysayan natin ay wala pang senador ang nakagawa niyan.
Bakit? Aba eh, alam naman natin na ang trabahong gagampanan ng mga senador ay ang pagpapanukala ng batas.
Ngunit huwag nating kalilimutan na hindi lahat ng panukalang batas ay naaaprubahan!
Tingnan na lang ninyo ang FOI bill na kung tutuusin ay malaki ang maitutulong para mabawasan ang korapsyon, pinalusot ba nila? Hindi!
Maaaring magpanukala ng batas si Bam Aquino na makapagbibigay ng trabaho sa iilan o karamihan pero ‘di sa lahat.
Maaaring magpanukala ng batas si Bam Aquino na makapagbibigay ng negosyo sa iilan o karamihan pero ‘di sa lahat.
Maaaring magpanukala ng batas si Bam Aquino na makapagdudulot ng asenso sa iilan o karamihan pero ‘di sa lahat. Ngayon sasabihing tiyak?
Maliwanag na pambobola ‘yun, parekoy, at kung ngayon pa lang ay binobola na tayo, gaano pa kung mailuklok na?
-o0o-
GALIT tayo parekoy sa kung sinomang terorista o grupo na may gawa ng magkasunod na pagsabog sa Boston, USA.
Nakikiramay rin po tayo sa pamilya ng mga biktima nitong panibagong karahasan na kumitil ng mga buhay at ikinasugat ng napakaraming tao.
Utak demonyo ang may gawa nito! Tangna nila!
Sandali nga pala, parekoy, bakit kung sa Pinas may nagaganap na kaunting alingasngas ay kaagad naglalabas ng “advisory” o travel ban ang Amerika na kesyo huwag pumunta ang kanilang mamamayan sa ating lugar kung saan naganap ang karahasan?
Pero bakit wala man lang tayong inilabas na advisory o travel ban sa ating mga mamamayan na huwag munang pumunta sa Boston o sa Amerika? Ganito ba tayo kainutil?
