HINDI lang isa, kundi dalawang affidavit, ang isinumite sa amin sa Lawyers for Commuters Safety and Protection.
Humihingi ng tulong ang mga biktima na ang reklamo ay tungkol sa mga fixer na gumagamit sa pangalan ng LTFRB sa paggawa ng iligal.
Ang lakas ng loob ng mga fixer na ito dahil ang kanilang sinasabing opisina na ginagamit sa paggawa ng kawalanghiyaan ay nasa gilid lang daw mismo ng LTFRB office at isang beauty parlor na ang pangalan ay “Myrn.”
Gumawa na ako ng sulat kay LTFRB Chairman Delgra para i-report ang mga fixer na ito at para mapuntahan na ng tropa ng LTFRB.
Ang modus ng fixer ay nangangako ng prangkisa sa mga biktima at nanghihingi ng malaking halaga ng pera.
Naengganyo raw na kumuha ng hulugan na van si Dariel Media Japon at kapatid na Dimple at ang mag-asawang Jimmy at Jonalyn Agmata dahil sa pangako na mabibigyan sila ng prangkisa para maibiyahe na pampasahero ang kanilang mga van.
Ang nanloko sa kanila ay si Franquilino B. Nepio, na nagpakilalang presidente ng MVFAODC Transport Inc. (Valenzuela exit – Trinoma) at ang ipinangako sa kanila ay sa oras na mabayaran daw ang fees ay makakapag-o-operate na sila ng UV business na hindi na aalalahanin ang LTFRB, ang HPG at maging ang MMDA.
Ayon sa salaysay ng magkapatid na Japon, ang mga halagang binigay nila kay Nepio at Myrna Espital ay P55,000, P50,000, P150,000, at P10,000.
Ang tagatanggap ng pera para kay Nepio ay si Espital nga na sinasabing may-ari ng parlor sa QC, ang kanyang buong pangalan sabi ng mga biktima ay Myrna Tria Vargas Espital.
Sa kaso ng mag-asawang Agmata ang mga ibinayad nila kina Nepio at Espital ay P40,000, P20,000, P3,800, P10,000, P20,000, P30,000, at P100,000.
Sa ngayon, hindi naman nagbibiyahe ang mga van ng mga biktima dahil nabatid nila na ang hinintay nilang prangkisa kuno na ipinangako ni Nepio at Espital ay nauwi sa Provisionary Authority na peke.
Dumulog ang mga biktima sa amin sa Lawyers for Commuters Safety and Protection. SIBOL/ATTY. ARIEL ENRILE-INTON
