SASABIHIN siguro ng iba na minsan – puro reklamo kasi ang mga Pinoy, hindi na nakuntento. Hindi ako agree rito.
Sa mayayamang bansa, unang mapapansin ang lakas magreklamo ng mamamayan, lalo kapag palagay nila ay ginagamit ang perang mula sa buwis at hindi sila masaya sa serbisyong natatanggap.
Maganda ang mga reklamo, lalo kung may tama at sapat na batayan. Mula nang aming inanunsyo ang libreng ligal na konsultasyon sa aming grupo – ang Lawyers for Commuters Safety and Protection – marami kaming natatanggap na reklamo, lalo tungkol sa mga isyu sa lansangan.
Eto ang ilan sa mga reklamo ng ating mga kababayan
Reklamo 1. ‘Yung usual na pamasahe ko from Megamall to Philcoa, P18.00, pero sa bus na “Taguig Metro Link” kanina po, P20.00 ang siningil sa akin. Dalawang beses ko na pong nasakyan ang bus na ‘to. ‘Yung ibang express na bus hindi naman ganu’n ang singil, pero ito po twice ko na pong nasakyan at laging mas mahal ng 2 piso ang singil sa akin kahit nagrereklamo ako.
Reklamo 2 (ito ang mas nakaaalarma). “Sumakay po ako ng taxi galing Leveriza papunta sa Intramuros mga 1:30 ng hapon. Pagsakay ko po ay kinausap ako ng driver tungkol sa kung saan kami dapat dumaan kasi po traffic. Sabi ko, sige po, doon na tayo. Tapos tinanong na niya kung saan ako nag-aaral at ano ang kurso ko. Tapos sabi n’ya, huwag ka nang pumasok, matulog ka na lang. Gusto mo matulog na lang tayo. Tapos po, narining kong nag-lock ang mga pinto ng taxi. Lingon siya ng lingon ay tinitingnan niya ako mula ulo hanggang paa. Natakot na po ako. Nang tumigil po ay bigla akong bumaba, buti may sidecar boy na kilala ko. Sinubukan nilang habulin ang taxi pero mabilis po umalis.”
Dalawa lang po ito sa mga kaso na tinututukan namin. Buti na lang at nakunan ng nagreklamong estudyante ang bastos na taxi driver at nakuha niya ang plate number.
Pinost na rin niya ang kwento, pati mukha ng bastos na driver, sa kanyang FB page at nagreklamo na sa LTFRB.
Hindi madali sa ating mga kababayan ang magreklamo, minsan ikaw na ang biktima ay naba-bash ka pa at hahanapan ka ng kasalanan.
Marami pa po tayong mga sumbong. Tutok lang po habang humahanap tayong lahat ng hustisya. SIBOL/ATTY. ARIEL ENRILE-INTON
