MALAKI ang naitutulong ni Technical Education and Skills Development Authority (TESDA) Director General, Secretary Guiling “Gene” Mamondiong sa kampanya ni Pangulong Rodrigo Duterte na mabigyan ng sapat na skills training ang bawat mamamayan na nagnanais matuto nito.
Sa pamamagitan ng pagpapaigting sa mga serbisyo ng TESDA ay mas madali na ngayon na naibibigay ang skills training para sa mga kababayan nating gustong matuto nang sa gayon ay magkaroon ng sapat na kasanayan ang mga ito para sa kanilang magandang kinabukasan.
Katuwang din ni Duterte si Mamondiong sa pagsusulong ng Comprehensive Reform and Development Agenda ng national government na naglalayong mabigyan ng mga makabuluhang proyekto ang Autonomous Region in Muslim Mindanao (ARMM) at iba pang rehiyon sa Mindanao na apektado ng mga nagaganap na kaguluhan.
Sa pamamagitan kasi ng CRDA ay mas mapadadali na para sa national government na maglaan ng pondo para sa mga mapipiling proyekto na higit na kailangan sa mga nabanggit na rehiyon.
Isa pa sa proyekto ng TESDA ay ang pakikipagtulungan sa Liga ng mga Barangay sa Pilipinas nang sa gayon ay mas madaling maihatid ang serbisyo sa mga kababayan nating naninirahan sa mga liblib na lugar.
Iniisa-isa rin ng pamunuan ni Mamondiong ang lahat ng sektor ng lipunan upang mahatiran ng serbisyo ang mga ito mula sa TESDA.
Mas magiging kapaki-pakinabang din sa mga kababayan nating naninirahan sa malalayong lugar ang ibibigay na skills training ng TESDA dahil daraan muna sa pag-aaral ang isang lugar upang matukoy kung anong kasanayan ang ibibigay sa mga residente.
Sa pamamagitan nito ay tiyak na magagamit ng mga kababayan natin ang skills training na ibibigay sa kanila dahil higit itong kailangan sa kanilang lugar.
Bukod dito, plano rin ni Mamondiong na magsagawa ng renobasyon sa TESDA training centers at sa mga kagamitan nito upang higit pang makapagbigay ng maayos na serbisyo sa mga nangangailangan nating kababayan.
Ilan lamang ang mga nabanggit na proyektong ito ang patuloy na isinusulong ni Mamondiong at patuloy ang pamunuan nito sa paghahanap ng mga makabagong paraan upang higit pang mapaigting ang pagbibigay ng serbisyo sa mga Filipinong hangad na magkaroon ng skills training. ALINGAWNGAW/ALVIN FELICIANO
