TALAMAK ang operasyon ng Mafia ‘di lamang sa Metro Manila kundi sa iba’t ibang siyudad sa kapuluan, kakutsaba ang mga law enforcer gaya ng mga pulis at kagawad ng National Bureau of Investigation.
Patunay ‘yan na napakalawak ng nasasakupan nitong mga sindikato sa iligal na droga at extortion racket.
Ayon sa Philippine Drug Enforcement Agency (PDEA) Region 7, totoo ang tinuran ni President Rodrigo Duterte na may Korean Mafia na sangkot sa illegal drug trade at prostitution sa Cebu at iba pang lokalidad.
Noon pang 2009 ay rumaraket na ang sindikato na nambibiktima sa mga negosyanteng Koreano sa bansa, ayon kay PDEA 7 Director Yogi Filemon Ruiz.
“We caught a Korean national last September who posed as a tourist guide and was also found to be selling drugs among his clients. That is an indicator that there is a syndicate moving underground in Cebu City,” sabi ni Ruiz.
Ayon kay Ruiz, naaresto nila ang isang nagngangalang Kim See Woong, 47, alias Kuma, sa kasong possession of illegal drugs sa Cebu province kung saan mahigit 25,000 Koreano ang naninirahan.
Ibinulgar ng PDEA official na ang suplay ng shabu sa South Korea ay galing sa Cebu at nagkakahalaga ng 30,000 hanggang 40,000 dollars bawat kilo at tataas pa nang 100,000 hanggang 130,000 na dolyar.
Tayo pala ang exporter ng crystal meth sa ibang bansa!!!
***
SAMANTALA, hindi ako magtataka kung nabuwisit at nawalan na ng tiwala si Manong Digong sa kagawaran ng National Bureau of Investigation dahil lumitaw na sangkot pati mga opisyal ng NBI sa pangingikil sa mga Korean businessman.
Ayon sa Philippine National Police sources, sangkot ang Mafia ng NBI officials at PNP scalawags sa kidnap-slay case ni Jee Ick Joo.
Inutos ni Manong Digong kay PNP chief Director-General Ronald Dela Rosa na itigil ang PNP anti-illegal drugs drive “Tokhang” na sinamantala ng Mafia sa pangingikil.
Mabuti pa sibakin na kaagad ‘yang tiwaling NBI officials at PNP scalawags!!! DEADSHOT/ERWIN TULFO
