NOONG Huwebes (Abril 25) ng gabi, target ng ‘di pa nakikilalang assassin si Vice Mayoralty bet Nani Almeda, ayon sa ulat na natanggap natin.
Nagsasagawa ng caucus ang grupo ni Almeda sa PNR compound nang mapansin ng kanyang bodyguards ang gumagalang ‘lazer light’.
Ilang sandali pa ay tumama ang ‘lazer light’ sa ulo at pagkatapos ay nalipat sa dibdib na naging dahilan para magkagulo ang meeting.
Para maiwasan ang anomang tangka sa buhay ni Almeda, kaagad na sinaklolohan ng mga escort at supporter, ibinaba sa entablado at inilayo ito.
Kapag nagkataon, yari si Almeda na ayon sa mga survey ay nangunguna at posibleng maging Bise Alkalde ng Caloocan.
Hindi nga imposibleng target si Almeda ng assassin dahil sa ipinakikitang lakas sa mamamayan ng kanyang kandidatura.
Ang naturang pangyayari ay naging dahilan din ng ka-guluhan na nag-iwan ng sugat at nakasakit sa maraming dumalo sa caucus.
Ayon pa sa ulat, kasama ang mga galit na tao, tinangka ng bodyguards ni Almeda na habulin at hulihin ang dalawang tao subalit sila’y nakatakas.
Paulit-ulit ang karahasang nangyayari sa Caloocan pero, ‘di natin nararamdaman ang aksyon ng kapulisan para maiwasan ang mga ganitong kaganapan.
Nais ang katahimikan kaya ipinag-utos ni Pangulong Aquino sa PNP na bantayan at siguraduhing malinis ang isasagawang darating na halalan.
In fairness sa Pambansang kapulisan, sa ibang lugar sa Metro Manila, walang iniuulat na kaguluhan.
Only in Caloocan.
Sa nakikita natin, ‘di dapat maging kampante ang kapulisan, lalo na ang Northern Police District (NPD) na may hurisdiksyon ng Caloocan.
Ang ikatatagumpay ng eleksyon sa Caloocan ay nakasalalay sa mga kamay ni NPD Director C/Supt. Joel Alvarez.
Hayaan mo na, General, kung ayaw magtrabaho ni Caloocan Police Chief S/Supt. Rimas Calixto.
Sibakin n’yo na lang siya pagkatapos ng eleksyon.
