NASIBAK na si Gina Lopez bilang kalihim ng Department of Environment and Natural Resources.
Sa botong 8 pabor at 16 kontra sa kanya sa Commission on Appointments na binubuo ng mga senador at kongresman, sinasabing hindi na pupwedeng ibalik kahit ni Pang. Rodrigo Duterte si Lopez sa posisyon nito.
May mga nagpiyesta sa nangyari kay Lopez samantalang nagluksa naman ang iba.
MGA NAGPIYESTA
Siyempre pa, unang nagpiyesta ang mga may-ari ng mga minahan na binubuo ng mga malalaking lokal at dayuhang negosyante.
Gayundin ang mga obrerong nanganganib o aktwal na mawalan ng trabaho sa mga minahan na pupwedeng ipasara o suspendihin ang operasyon ng DENR dahil sa mga paglabag sa mga batas sa pagmimina.
May iba pang nakikinabang din sa ibang mga paraan gaya ng komunidad na nabibigyang-pabor ng mga mining company.
At mga opisyal din ng pamahalaan na nakikinabang sa korapsyon at pandarambong sa pagmimina at mga nabibiyaan sa P70-bilyong buwis taon-tanon ng mga minero.
NAGLULUKSA
May mga nagluluksa naman sa pagkabasura kay Lopez.
Kabilang dito ang umaasa na sa pamamagitan ng tamang pagmimina, mapipigilan ang kalikasan na sumalakay sa mga mamamayan sa tag-ulan at tagbagyo.
Nagmumula sa mga kinakalbo at ginigibang bundok ng mga minero ang mga katakot-takot at nakamamatay na baha at pagguho ng lupa sa tag-ulan at tagbagyo.
Sinasalakay na rin ng mga daluyong at tsunami ang mga komunidad sa mga dalampasigan na inuubusan ng blacksand ng mga minero.
Habang ginigiba ang mga bundok at isinasakay sa mga barko palabas ng Pilipinas ang mga lamang bundok, kasama na ang mga ginto, pilak, tanso at iron ore, nawawalan din ang iba ng pag-asa na mapakikinabangan nila at ng bayan ang mga kayamanang ito.
Hindi imposibleng bago sila makapagtayo ng mga pabrika ng bakal at iba pa para sa industriyalisasyon ng mahal kong Pinas, wala nang mapagkukunan ng mga hilaw na materyales para sa kanilang mga pabrika o pagawaan.
At magpapatuloy ang mga Filipino na tagabili, tagagamit at tagabuo o asembol lamang ng mga imported na gawa sa bakal, ginto, pilak at tanso gaya ng mga makina, computer, sasakyan at marami pang iba.
NASIMULAN IPAGPATULOY
Sa lumalabas na balita mula sa Palasyo, sinasabing kung ano ang napasimulan ni Lopez ay siyang dapat na ipagpatuloy ng susunod na mamumuno ng DENR.
Kabilang dito ang istriktong pagpapatupad ng batas para sa tamang pagmimina.
At sa tamang pagmimina, hindi masisira ang kalikasan at pagmumulan ng mga delubyo gaya ng mga baha, landslide, tsunami, bagyo na ikinamamatay, ikinasusugat at ikinahihirap ng higit na nakararami.
Tamang pagmimina rin ang pagbibigay sa mga komunidad ng minahan ng sapat na mga halaga at kakayahan na makamit ang magandang kinabukasan sa lugar na malaya sa anomang panganib sa delubyo, sakit at kawalan ng kinabukasan.
Tamang pagmimina rin ang pagbabayad ng tamang buwis para sa serbisyong bayan.
Tamang pagmimina rin ang paglalaan ng yaman ng bansa para sa mga susunod na henerasyon at hindi para lang sa iilang may-ari ng mga minahan na mga Pinoy at dayuhan na pagkaubos ng mga yaman ng bansa, basta na lang sila lalayas at iiwan sa kawalan, kasiraan at lason ang bayan at ang kapaligiran.
SISIBAKIN DIN BA?
Ang tubo, ang dambuhalang salapi na makakamit sa pagmimina ang pangunahing laman ng isip at pinagkakaabalahan ng mga may-ari ng mga minahan at mga kapanalig nila sa pamahalaan.
Ang kapakanan ng bayan, maging ang pamahalaan, ay nasa tabi-tabi lang.
Kaya nga, ang mga anyo ng tamang pagmimina, kung paiiralin man nila ay consuelo de bobo lamang.
Sa kalagayang ito, ano ang mangyayari kung ang papalit kay Lopez ay ipagpatuloy nito ang nasimulan ni Lopez?
Ang sabi ng mga minero at mga mambabatas na kasapi ng mga CA na ang ilan ay may-ari o kasosyo rin sa pagmimina, pangunahing dahilan ng pagsibak nila kay Lopez ang kawalan o labis na kakapusan ng pakikipag-ugnayan nito sa mga minero at paggawa ng mga patakaran na wala umanong sapat na basehan sa batas.
Subalit, kung palalamin nang husto ang usapin, ang totoo ay sisibakin nila ang sinomang haharang sa kanilang pagmimina, kahit sandamukal ang mga paglabag nila sa batas at paninira sa kalikasan at buhay ng mga mamamayan.
Sa huli, hindi kaya pati ang Pangulo na namimili at nagtatalaga ng katulad ni Lopez at susunod pang Lopez ay kanila ring ibabagsak?
oOo
Anomang reklamo o puna ay maaaring iparating sa www.remate.ph o sa 09214303333. ULTIMATUM/BENNY ANTIPORDA
