NAKIPAGSANIB-PUWERSA ang Land Transportation Franchising and Regulatory Board (LTFRB) sa Pag-IBIG Fund upang magkaroon ng pabahay ang kanilang mga empleyado.
Nilagdaan nina Pag-IBIG Chief Executive Officer (CEO) Acmad Rizaldy P. Moti at LTFRB Chairman Atty. Martin B. Delgra III ang Memorandum of Understanding (MOU) noong inilungsad ang programang BALAI Filipino (Building Adequate, Livable, Affordable, and Inclusive Filipino Communities).
Ang naturang pagbubuklod ay sinaksihan nina Chairperson of Housing and Urban Development Coordinating Council (HUDCC) at Pag-IBIG Board of Trustees Eduardo D. del Rosario at HUDCC Secretary General Atty. Falconi V. Millar. Naging institutional witnesses naman sina Pag-IBIG Deputy CEO Marilene C. Acosta (leftmost) at LTFRB Board Member Atty. Aileen Lourdes A. Lizada.
“Nakikipag-ugnayan ang Pag-IBIG sa iba’t ibang kumpanya, kabilang sa mga ahensya ng pamahalaan bilang tugon sa direktiba ni Panglong Rodrigo Duterte na tulungan ang mga manggagawang Pilipino sa kanilang mithing magkabahay. Suportado namin ang programang BALAI Filipino ni Secretary del Rosario’s,” pagdiin ni Moti.
-ooOoo-
URBANISASYON VS CLIMATE CHANGE
Hinikayat ni Kalihim Roy Cimatu ang mga miyembro ng Association of Southeast Asian Nations (ASEAN) na magtuon sa pagtatayo ng mga siyudad at urban na lugar dahil mahalaga at epektibo aniya ang magiging papel nito sa pagharap sa climate change.
“Bilang pagkilala sa mahalagang papel ng ating mga siyudad bilang sentro ng inobasyon, kailangan natin palakasin ang potensyal nito upang makayanang humarap sa anomang kalamidad,” pahayag ni Cimatu mula sa isang kilalang urban ecologist na si Dr. Henrik Ernstson.
Sinabi ni Cimatu na sa nakalipas na sampung taon ang mga bansa sa ASEAN ay palagiang nakararanas ng pagbaha, tagtuyot, matinding init at pagtaas ng tubig sa dagat bilang epekto ng climate change.
Sa datos ng World Bank, noong 2009 nanguna ang Pilipinas sa listahan ng madalas bayuhin ng bagyo, ang Vietnam ang ikalawa sa palaging may mataas na tubig sa dagat, samantala ang mga bansang Thailand at Vietnam parin ang pinaka naaapektuhan ng pagbaha.
At nito lamang nakaraang taon, naitala ng Global Climate Risk Index of GermanWatch ang sampung bansa sa ASEAN bilang pinaka naapektuhan ng climate change mula noong 1995 hanggang 2004 base sa annual averages.
Kaugnay nito, sinabi ni Cimatu na ang tatlong araw na regional forum na binuo ng Ecosystems Research and Development Bureau ng Department of Environment and Natural Resources ay mahalaga upang talakayin ang mga plano na magpapalakas ang urban areas.
Ang forum ay bahagi ng pagtitipon bilang pagdiriwang sa ika-50 anibersaryo ng pagkakatatag ng ASEAN na pinamunun ng Pilipinas. HILDA ONG
