SUNOD-SUNOD ang isinasagawang pagsalakay ng teroristang Bangsamoro Islamic Freedom Fighters (BIFF) partikular na sa Maguindanao, isa sa mga grupo na hadlang sa pagkakamit ng kapayapaan sa Mindanao.
Nitong pagpasok ng bagong taon ay dalawang insidente ng pambobomba ang isinagawa ng BIFF kung saan isang pulis at isang sibilyan ang nasawi at pitong iba pa ang sugatan.
Patunay lang iyan na talagang kinakailangan pa ang patuloy na pagpapairal ng martial law sa Katimugan bagaman naisalba na ang Marawi City sa pagkubkob ng Maute Group.
Dapat maging puspusan din ang pagtugis sa mga bandidong BIFF at gayundin sa Abu Sayyaf sa lalawigan ng Sulu.
Hindi na dapat magpatiyope-tiyope ang Armed Forces of the Philippines sa paghabol sa mga grupong iyan na namayagpag sa nagdaang mga taon dahil sa pagpapabaya ng pamahalaan.
Namimihasa na ang mga demonyong iyan.
Kung ayaw ng BIFF na makilahok sa pagsulong ng usapang pangkapayapaan at patuloy nitong sasalakayin ang mga tropa ng pulisya at AFP sa Maguindanao, walang dahilan para patawarin ang mga ito.
Ang BIFF ay sangkot sa maraming insidente ng terorismo kabilang na ang pagmasaker sa mga miyembro ng media at sa kaso ng Special Action Force (SAF) 44.
Panahon na para tuldukan ang pamamayagpag ng grupong iyan.
Panahon na para ipatikim sa mga iyan ang puwersa ng AFP tulad ng sinapit ng Maute Group at Abu Sayyaf sa Marawi City. DEADSHOT/ERWIN TULFO
