SABLAY at puro sa salita lamang na magaling ang kampanya ng Northern Police District para labanan ang lahat ng iligal na sugal gaya ng jueteng, lotteng, ending, Ez2 at marami pang iba na ipinagbabawal ni Pangulong Rodrigo Duterte.
Ang daing kasi ng mga magulang, karamihan sa kanilang mga anak ang lulong pa rin sa iligal na pasugalan at taliwas sa buong pag-aakala nila na matatapos na ang paglaganap ng mga iligal na pasugalan.
Tila waepek ang warning mismo nina Pang. Duterte at PNP chief Gen. Ronald dela Rosa sa kapulisan na sisibakin ang sinomang kagawad ng pulisya na nakikipagkutsabahan sa mga iligalista.
Napag-alaman pa ng mga magulang na isang suspended police ng NPD na may alyas na Major Walang Galang ang “patong” sa mga iligal na pasugalan na pinatatakbo ng gambling operators diyan.
Ibang klase si major.
Kahit suspendido raw ang kumag, pader pa rin ito kay NPD Director Gen. Armando Empeso.
Hindi ako nagtataka na pader nga si major, kasi, si Gen. Piso, este, Empeso ang amo niya.
Mantakin ninyo, sangkatutak ang iligal na pasugalan sa nasabing distrito pero nagtataka ang mga magulang at iba pa kung bakit ‘yung mga kakaning-itik lamang na pasugalan ang hinuhuli ng mga pulis dito.
Nananatiling gumagana ang mga pasugalan ng isang alyas Galgano sa mga barangay na hindi hinuhuli ng mga pulis dahil direkta ngang may “tongpats” sa tanggapan ni NPD director.
Kaya nanawagan ang mga magulang ng mga taga-CAMANAVA kina Pang. Duterte at Gen. Dela Rosa na aksyunan ang kanilang mga reklamo sa malawakang pangongotong sa sugalan ng mga pulis .
KAY KAP ANG PAIHI
Opppssss, sa gabi raw isinasagawa ang operasyon ng paihi ng mga petroleum product (pilferage) ng isang barangay kapitan na may alyas Moymoy sa garahe ng mga tanker sa Brgy. Concepcion, Batangas City.
Ang balita, si alyas Kap Moymoy ang kapitalista ng nasabing paihi kaya hindi magalaw-galaw ninoman ang kanyang sindikato.
Bukod kasi sa malaki ang lagay nito sa mga lespu, ipinangangalandakan din niya ang pagka-kapitan niya.
Sa umaga naman dinidispose ng kumag na kapitan ang mga pinaihi na mga gasolina, diesel at iba pa sa kanilang mga ready buyer.
o0o
Anomang puna o reklamo i-text sa 09189274764, 09266719269 o i-email sa juandesabog@yahoo.com. JUAN DE SABOG/JOHNNY MAGALONA
