ANO na ba itong nangyayari sa ating mga kapulisan? Kung sino pa ‘yung mga inaasahan ng mamamayan na magtatanggol sa kapakanan ng publiko laban sa mga kriminal, ang kapulisan pa mismo ang nagsisilbing pasimuno ng mga kawalanghiyaan.
Halos lahat-lahat na yata ay ibinigay na ni Pangulong Rodrigo Duterte sa kapulisan gaya ng pagtaas ng kanilang mga sahod para lamang matugunan nila ang magandang buhay at makapagserbisyo sila nang maayos sa publiko at hindi sila makaisip na gumawa ng masama na ikasisira ng buong pulisya.
Pero tila mas lalong umaaabuso ang mga lintik na katulisan, este, kapulisan na ito sa kanilang ginagawang mga estilo ng panghuhuli sa mga suspected na kriminal.
Gaya na lamang sa ginawa sa isang eleven years old na batang babae na umano’y kinapkapan at saka hinipuan sa wetpu ng apat na mga tarantadong pulis na nakatalaga sa Drug Enforcement Team ng Presinto-4 ng MPD.
Ang palusot ng apat na pulis na kinilalang sina SPO3 Rolnado Moranda, SPO2 Ca-milo Maramag, PO1 Angelo Borbe at PO1 Lourenz Gorgon, ang eleven years old na batang babae ay nagsisilbing “courier” daw ng shabu kaya nang maispatan nila na papunta ng tindahan ang dalaginding ay kaagad nila itong sinita.
Ang sumbong naman ng dalagita ay pinisil daw ng mga tarantadong pulis na ito ang kanyang wetpu sa isang madilim na bahagi sa Prudencio St. na sakop ng Barangay 484 sa Pandacan.
Ang tanong ko, tama ba na pisilin ng mga gagong pulis na ito ang wetpu ng bata? Kahit sabihin na nating ligal ang drug operation na isinasagawa ng mga nasabing pulis, hindi po ligal ang ginawa nilang panghihipo sa wetpu ng bata. Tuloy nawawala ang paggalang ng tao sa mga pulis!
Ang mas masahol na gawa ng pulisya ay katulad ng ginawa ng apat na miyembro ng Meycauayan Police sa Bulacan. Walang patawad na halinlinang ginahasa ng mga ito ang isang 7-weeks na buntis na ginang sa isang abandonadong bahay.
Umayaw na nga lang na magharap ng reklamo ang biktima sa hindi natin malaman na kadahilanan.
Ngayon ninyo sabihin, bayan,dapat pa bang pagtiwalaan ang mga pulis? I’m not against sa mga pulis. Katu-nayan, napakarami kong kaibigang pulis, bukod pa sa pamangkin at mga pinsan ko. Pero ni isa sa mga ito ay walang nakaisip na mang-agrabyado ng tao lalo pa’t ngayon ay nasa likod nila si Presidente.
PD WALANG GINAGAWA VS PAIHI
Wala pa rin daw aksyon ang kapulisan ng Limay, Bataan sa talamak na pagnanakaw o pagpapaihi ni Cris Velasco petroleum products ng malalaking kompanya ng langis na idinideliber ng mga oil tanker sa mga gasoline station at iba pa.
Hanggang ngayon, tila nakatunganga at nagkakamot lang ng ulo itong si Bataan PD Supt. Marcelo Dayag. Hindi ko malaman kung tumatanggap o hindi ng lingguhang ‘tongpats’ si koronel sa nasabing iligal na gawain ni Cris Velasco
Anomang puna o reklamo i-text sa 09189274764, 09266719269 o i-email sa juandesabog@yahoo.com. JUAN DE SABOG/ JOHNNY MAGALONA
