ANG mga empleyado ng National Irrigation Authority (NIA) ay nagtipon–tipon sa harap ng IEC building upang opisyal na simulan ang 100 araw na pagbilang sa pagsisimula ng 50th Founding Anniversary ng NIA na magaganap sa darating na Hunyo 22, 2013.
Sina NIA Administrator Antonio S. Nangel at OIC Senior Deputy Administrator Claro V. Maranan ang nagbukas ng kurtina ng signage at tumambad sa publiko ang higanteng mosaic ng Magat Dam na kinapapalooban ng maliliit na replika ng personalidad ng NIA at ang mga proyekto nito.
Sa itaas ng mosaic ay ang anibersaryong logo na una nang inilunsad na may pang-anibersaryong tema na, “NIA @ 50: Serving the Farmers with Excellence and Commitment to Continue its Legacy in the years to come”.
Ayon kay Administrador Nangel, ang naging tagum-pay ng NIA ay dahil na rin sa pagpupunyagi ng mga tauhan na nagkakaisa at masipag na naglilingkod. Winakasan ni Administrator Nangel ang mensahe sa pamamagitan ng isang PNoy line “KAYO ANG BOSS KO” na lalong nagpataas ng moral ng mga empleyado. Kapareho ring mensahe ang ipinakita sa iba pang mga opisina sa buong kapuluan sa pamamagitan pre-recorded video na ipinadala bago ganapin ang pagdiriwang.
Upang pormal na wakasan ang aktibidad, 50 tao na kinabibilangan ng top management, department division heads at project managers, at iba pang mapalad na empleyado ang pinili upang magpakawala ng green at gold (anibersaryong kulay) balloons upang ipakilala ang may 50 taong pagtatrabaho katuwang ang ating mga magsasaka upang mapataas ang produksyon ng bi-gas gayundin para sa mas pinabuting paraan ng ating mga irigasyon.
