MAGANDANG pag-isipang mabuti ang panukalang pag-abolish sa Bureau of Customs na matagal-tagal na rin namang tinaguriang pinaka-corrupt na ahensiya ng pamahalaan.
Mukhang tama ang panukala ni Comm. Ruffy Biazon na hindi na kakayanin ng gobyerno ang paglilinis lang sa nasabing ahen-siya kung saan iilang tauhan, mula sa opisyal at empleyado, ang naaapektuhan. Kasi naman ang nasisibak lang ay iyong nabubuking na gumagawa ng himala sa BOC pero iyong mga malalalim ang koneksyon, lalo na sa mga smuggler, ay hindi naman nabubuking.
Siyempre, aminin man o hindi ni Biazon, hindi nasisibak ang mga nauulingan dahil malapit sa palayok.
Tamang-tama ang suhestiyon ng komisyoner na maglagay ng panibagong ahensiya na ang mga kukunin lang ay mga kwalipikado at hindi iniendorso ng kung sino-sinong Poncio Pilato. At para nga hindi matutong maging tiwali, kailangang sapat kung hindi man malaki ang suweldo ng mga empleyado na kukunin para magtrabaho sa bagong Aduana.
Habang ang mga gamit lalo na ang mga nakumpiskang mga produkto o epektos ay dapat isubasta nang maayos at hindi pabara-bara. Marami kasi sa mga nakumpiskang produkto, lalo na ang mga hindi nabubulok, ay pinakikinabangan sa auction ng mga opisyal, empleyado at negosyanteng mga nanlalaki ang mata kapag nakakikita ng pagkakaperahan.
oOo
MALAKI ang suportang makukuha ng Aagapay sa Matatanda (AMA) sa halalan ngayong Mayo 13 mula sa mga matitikas na abogado.
Kasi naman, iniendorso ni Atty. Jun P. Icaonapo, dating Integrated Bar of the Philippines-President, Manila 111 Chapter, IBP Governor for Greater Manila Region and President, Philippine Trial Lawyers Association, Inc. (PTLA) ang bagong partylist ng mga senior citizen na AMA na magbibigay ng mga pangngangailangan ng matatanda. Nais ng IBP at PTLA na palawakin ang programang pangkalusugan, scholarship grants, livelihood sa pamamagitan ng senior citizens cooperative drug stores, pagtatayo ng regional centers, regional Home for the Aged Centers, pagbubuo ng Para legal at legal teams at pagbibigay ng Social Pensions sa lahat ng miyembro ng grupo.
Eh bakit naman hindi pagkakatiwalaan ang AMA gayung si Agustin Dizon na Ret. Associate Justice ng Court of Appeals ang isa sa mga nominee ng grupo.
