SA bagong kaganapan ng Media Killings na ikinasawi ng isa nating kasamahan sa pamamahayag, hindi nangangahulugan na mababahag at masasagkaan ang hanay ng Journalists at sa halip ay lalo lang magpapatatag at magpapalakas sa kalayaan ng pamamahayag sa ating bansa.
Nitong May 3, ang Presidential Task Force on Media Security sa pangunguna ng inyong lingkod kasama sina Special Assistant to the President Christopher “Bong” Go; Presidential Communication Operations Office Secretary and PTFoMS co-chair Martin Andanar at Philippine Information Agency Deputy Dg Gelo Villar ay tinungo namin ang burol ng kasamahan nating anchorman na pinagbabaril ng 2 hindi nakikilalang lalaki na si Edmond Sestoso sa Brgy. Daro, Dumaguete City noong April 30.
Sa ikalulutas at ikadarakip ng mga salarin, ang binuong Special Investigation Task Group Sestoso at sa inisyatiba ni SAP Bong Go ay naglaan ng pabuya o reward na P400,000 na ipagkakaloob sa sinumang makakapagturo o makakatulong para sa ikaaaresto ng mga salarin. Ang cash reward na P400K ay manggagaling sa National Government ang P200K at ang tig P100K ay magmumula naman kina Negros Oriental Gov. Roel Degamo at Dumaguete City Mayor Felipe Antonio Remollo.
Si Sestoso, 51, anchorman ng POWER 91 DYGB FM radio sa Dumaguete City, Negros Oriental na personal na kakilala ni Sec. Andanar at sa utos ni President Rodrigo Duterte ay mismong si Go ang nag-atas kay Acting Police Provincial Director Sr. Supt. Edwin Portento na laanan ng seguridad ang pamilya ng napaslang sa pangunguna ng asawa nitong si Lourdes na nangangambang maging sila man ay tatargetin ng mga salarin.
Bahagi ng seguridad, binigyan din ni Go ng tig-isang mobile phones ang 2 anak ng mag-asawang Sestoso para kung may peligro man ay agad na makontak si Go ng 2 batang Sestoso.
Inatasan din ni Go ang Law Enforcement Agencies partikular na ang Philippine National Police at ang National Bureau of Investigation para maigawad ang hustisya sa sinapit ni Sestoso.
Habang ipinagluluksa natin ang pagkawala ng kasamahan natin sa media profession, titiyakin natin ang ating safety nets at sa sinapit ni Sestoso ay gagawin natin ang lahat ng makakaya natin. And to the perpetrators of these dastardly acts against our brethren, our battle cry shall be: HULIHIN! HABULIN AT IPAKULONG! DALA KO EGCO/ JOEL EGCO
