BAGO pa man magsimula ang botohan kahapon ng alas-7:00 ng umaga ay dagsa na ang mga taong gustong-gustong makaboto agad para makauwi sila nang maaga sa kani-kanilang mga bahay ngunit dahil nagloko at pumalpak ang ilang pcos machine ay hindi kaagad nakapag simula ang ilang presinto sa takdang oras.
Ilan sa mga problemang ating nakita sa hindi pagsisimula sa tak-dang oras ay dahil sa napakaraming dahilan katulad ng hindi pa ayos ang pcos machine at hindi ito gumagana, mga nawawalang list of voters at ang pinakamaraming problema ay ang mga nawawalang pangalan ng mga botante
At tulad din ng dati, maraming pangalan ang nakalista pa gayung ang mga ito ay matagal ng namayapa at ang iba naman ay nasa ibang bansa na o lumipat na ng tirahan.
Bakit tuwing election na lang ay parating ganitong problema ang kinahaharap ng ating mga botante?
Hindi ba ito kayang solusyunan o gawan ng paraan ng mga namumuno sa Comelec?
Sabagay kasi maliit lang ang kikitain dito ng Comelec o baka nga wala pa silang kitain kung kaya hindi nila ito masyadong binigyan ng pansin na ma-check nang husto ang mga botante dahil ang kanilang attention ay nasa malalaki ang kita.
Ano ngayon ang masasabi ni Comelec Chairman Sixto Brillantes sa ilang pcos machine na hindi umandar at nagluluwa lang ng mga papel.
Akala ko po ba, Chairman Brillantes, handang- handa na ang Comelec sa election 2013. Eh, bakit ang daming bulilyaso sa mga presinto na sanhi ng mga pcos machine?
Marami rin tayong nakausap na mga botante na nagsasabing gustong-gusto nilang bomoto para manalo ang kanilang mga kandidato, ngunit natatakot daw sila at kinakabahan dahil mga sira ang mga pcos machine na ipinagmamalaki ni Brillantes.
Sigaw ng ilang kabataan sa ilang paaralan sa lungsod ng Quezon ay ibalik na lang ang mano-manong bilangan ng boto sa mga presinto. Hindi bale nang matagal sigurado naman daw na mabibilang ang kanilang mga boto.
Katulad din ng inaasahan pagkatapos ng election, ay gabundok na basura na naman ang makikita sa kalsada o kahit saang sulok ka man mapalingon dahil sa mga tambak na flyer ng iba’t ibang kandidato na ipinamigay sa katatapos na election.
Hindi pa rin talaga natuto ang ating mga politiko at ang kanilang mga volunteer ng tamang pagliligpit ng kanilang mga ginawang pagkakalat sa lansangan lalo na nang bumuhos ang malakas na ulan lalong nagkalat at dumikit sa semento ang flyers.
Sa kabila ng paalala ni DENR Secretary Ramon Paje sa lahat ng mga kandidato at ng kanilang mga supporter na tumulong sa paglilinis ay hindi ito pinansin ng mga epal na kandidato.
Sa halip ay iniwanan lang ang mga kalat sa labas ng presinto.
Nagkukumahog ang mga volunteer, ‘yung iba ay pupunta sa bilangan at ang iba naman ay nag-mamadaling makapunta sa taong kumuha sa kanila para maningil ng P200 para sa kanilang “suweldo” o bayad sa maghapong pamimigay ng flyers.
‘Pag minalas-malas pa ‘yung iba ay hindi nababayaran lalo na kapag nakita na nilang mababa ang kanilang nakuhang boto. Sa madaling salita ay estafa ang aabutin ng mga volunteer.
