NATABUNAN sa kasagsagan ng eleksyon last week ang isang letter-complaint na na-receive ng Office of the Ombudsman.
Ang mag-asawang sina Sen. Manny Villar at ang senatorial candidate na si Cynthia Villar, kasama na ang di pa mabilang na opisyal ng Bangko Sentral ng Pilipinas (BSP), ay inireklamo ng pandarambong o plunder sa tanggapan ng Ombudsman.
Ang reklamo ay kaugnay sa diumano’y kutsabahan ng mga inireklamo upang makasungkit ng may P1.5-bilyong salapi ng bayan ang isang nabangkaroteng bangko, na dati’y kilala bilang Capitol Development Bank (Capitol) na pinalitan sa ngalang Optimum, na noo’y pag-aari ng kasalukuyang senador at ni ex-Representative Cynthia.
Sa kanilang inilatag na reklamo, sinabi nina Valentino I. Amador ng San Jose del Monte City at Vina S. Jarvina ng Novaliches, na nakakuha sa Bangko Sentral ng may halagang P1.168-bilyong “emergency loans” ang nabangkaroteng Capitol Bank noong 1998 nang walang kolateral, kaya’t maituturing itong iregular o labag sa batas.
Wala pang formal na aksyon ang Ombudsman at wala pa rin namang reaksyon ang mga Villar.
Inireklamo rin ng dalawa ang ‘di pa pinangangalanang mga opisyal ng BSP ng pakikipagkutsabahan sa dahilang hindi man lang sila gumawa ng masusing pag-aaral o “due diligence” o sumunod sa ligal na proseso bago nila inaprubahan ang iligal na pangungutang ng bangko ng mga Villar.
Base sa mga ebidensiyang isinumite nina Amador at Jarvina,ang tanging mga dokumentong isinumite ni Mrs. Villar at dalawang opisyal ng Capitol Bank bilang patunay ng pagkakautang ng nasabing bangko sa BSP ay dalawang “promissory notes” o pangako na magbabayad ng utang, ilang “receivables” ng Capitol at “deed of assignment” ng isang titulo ng malaking lupain sa Bulacan.
