TAMA ang panukala ng Malacañan na gawing patuntunan ang paglalagak ng mga kandidato ng cash bond para masigurong lilinisin nila ang kanilang mga kalat sa darating na mga election.
Ang proposal na ito ng Palasyo – sa palagay natin – ay mas maigi sa panawagan pa rin ng marami sa pagkakaroon ng batas na magbibigay-parusa sa mga kandidato na nagkakalat tuwing election.
Sa paniniwala natin, ang dalawang proposal na ito ay pupuwede. Para tiyak na makamit ang disiplina, siguro’y kailangang pagsabayin ang cash bond at batas laban sa mga ‘baboy’ ng kandidato.
Ayon sa Palasyo, ang cash bond ay hindi na maibabalik sa mga kandidato kung ‘di nila lilinisin ang kanilang mga kalat sa isinagawang kampanya.
Dapat lakihan ang cash bond para tiyak na babalik at maglilinis sa lansangan ang mga kandidato – nanalo man ang mga ito o hindi.
At kung salaking pagsabayin ang cash bond at batas, kailangang kumilos na ang Commssion on Elections para bago ang election 2016 ay maipatupad na ang mga balaking ito ng Palasyo.
Speaking of election, aminin natin na kumpara sa ibang bansa, ang Pinas ay napakalayo kung ang pag-uusapan ay disiplina sa pag-pili ng mga lider, tulad ng senador, kongresista, gobernador, mayor, bokal, konsehal, vice mayor atbp.
Napakarami sa ating mga kababayan ang nasisilaw sa pera, kapalit ng boto na inaalok ng mga tiwaling kandidato.
Kaya sa bansa natin, walang karapatang maging senador, kongresista o kaya’y gobernador o alkalde ang isang mahirap lamang kahit ito’y qualified na qualified na manungkulan.
Dahil sa kawalan ng pera, wala itong pambili ng boto katulad ng mga kandidatong sangkaterba ang kayamanan.
Dapat malaman ng mga kababayan nating nagbebenta ng boto na ang kanilang tinanggapan ng pera, kapag nanalo sa election, ay siguradong babawiin ang nagastos kapag nakaupo na ito sa kapangyarihan.
Sana, dapat tama ang gagawin natin kapag pagpili na ng ating mga magiging lider ang nakataya.
