TIYAK na halos ang pagsasama ng pwersa ng Lakas-CMD at United Nationalist Opposition o UNA na pinamumunuan ni VP Jojo Binay sa Kamara.
Ito ang pinaka-latest na kaganapan ngayon sa daigdig ng pulitika sa bansa dahil nag-usap na sina Binay at ang tumatayong lider ng Lakas ngayon na si Leyte Rep. Ferdinand Martin Romualdez kamakailan lamang upang pag-usapan ang kanilang magiging tayo sa Mababang Kapulungan.
Bagaman hindi malaki ang bilang ng nanalong Lakas at UNA solons sa Kamara ay tiyak naman daw na mararamdaman ang kanilang presensiya dahil na rin sa napipintong pagsasanib-pwersa.
Tuloy-tuloy rin ang pag-uusap nina UNA Secretary General Toby Tiangco at Romualdez sa napipintong koalisyon at tiyak na isa na rin itong unang hakbang para mapalakas ang tsansa ni Binay sa 2016 presidential election.
Kapansin-pansin na talaga ang galaw ng mga partido ngayon at iisa ang kanilang agenda at iyan ay ang 2016 dearby.
Hindi malayong lumawak pa ang pakikipag-alyansa ng UNA sa iba pang partido dahil mukhang dito patungo ang kilos ng partido ni Binay dahil alam naman natin na hindi pa gaanong malaki ang katatayo pa lamang na koalisyon ng oposisyon na isinabak ngayong 2013 midterm election.
Kung ganito ang target na kilos ng Lakas ay tiyak na aangat na silang muli sa pulitika dahil isa si Binay sa pinakamalakas na kandidato sa 2016.
Sa tindi ng kaganapang ito ay marami pa tayong dapat abangan dahil ganito kasalimuot ang pulitika sa bansa na kung saan ang magkaaway noon ay nagiging magkakampi na ngayon katulad na lamang ng nangyari ngayon sa UNA ni Binay at Lakas ni dating Pangulong Gloria Macapagal-Arroyo.
